Governu Defende OJE ba tinan 2016 nian, ne’ebé dala ida tan hetan aprovasaun ho unanimidade hosi Parlamentu Nasionál
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Díli, loron 8 fulan-janeiru tinan 2016
Governu Defende OJE ba tinan 2016 nian, ne’ebé dala ida tan hetan aprovasaun ho unanimidade hosi Parlamentu Nasionál
Governu Konstitusionál VI, ne’ebé lidera hosi Primeiru-Ministru Rui Maria de Araújo, defende ona iha loron 8 fulan-janeiru, Orsamentu Jerál Estadu (OJE) ba tinan 2016 nian, iha Parlamentu Nasionál, ne’ebé deputadu sira, dala ida tan, halo konfirmasaun ba sira-nia aprovasaun unánime. Prezidente Parlamentu Nasionál, Vicente Guterres, daudaun ne’e haruka fila-fali lei ne’e, lahó alterasaun, atubele hetan promulgasaun hosi Prezidente Repúblika, Taur Matan Ruak. Tuir n.u 2 hosi artigu da-88, Konstsituisaun nian: “Karik Parlamentu Nasionál, iha prazu loron sianulu nia laran, konfirma votu ho maioria absoluta hosi deputadu sira ne’ebé serbisu efetivu hela, Prezidente Repúblika tenke promulga diploma ne’e iha prazu loron ualu nia laran sura hosi loron nia simu lei ne’e.
Hafoin prosesu orsamentál ida ne’ebé naruk no rigorozu durante tinan 2015 nia laran, Parlamentu Nasionál vota ho unanimidade ba aprovasaun Orsamentu Jerál Estadu ba tinan 2016 nian, iha loron 18 fulan-dezembru. Tuirmai lei ne’e lori ba Prezidente Repúblika atu hetan promulgasaun, ne’ebé hanesan direitu vetu nian ne’ebé nia ezerse tuir Konstituisaun prevee, haruka ona mensajen ida ba Parlamentu Nasionál hodi husu apresiasaun foun. Iha mensajen ne’e nia husu konsiderasaun atu aumenta verba iha área balun no hamenus iha balun, no hatudu mós ninia preokupasaun ho sustentabilidadae orsamentál.
Parlamentu Nasionál iha obrigasaun, tuir Konstituisaun, atu hala’o debate loron ida kona-ba kestaun hirak ne’e, atu altera lei ne’e atu nune’e bele hatama mós proposta sira husi prezidente, ka konfirma votasaun ne’e. Ohin, Parlamentu Nasionál konfirma ona nia votu, no mantein unanimidade.
Portavós Governu Konstitusionál VI, Ministru Estadu Agio Pereira, bainhira reflete kona-ba deklarasaun hirak ne’ebé deputadu parlamentár barak halo ona salienta katak “lisaun folin boot tebes husi demokrasia no respeitu kle’an ida ba pilár soberania Timor-Leste nian sira hatudu ona durante debate ohin loron nian. Haree ba faktu Parlamentu Nasionál hili ona atu konfirma votasaun iha loron 18 fulan-dezembru nian, la halo alterasaun sira ba Lei Orsamentu ne’e nian hodi akomoda pedidu sira husi Prezidente, no deside hodi haruka fila-fali lejizlasaun ne’ebé hanesan ba Prezidente hodi hetan pareser ne’ebé favorável, hatudu integridade hosi planeamentu orsamentál no prosesu aprovasaun nian. Tuir Konstituisaun, Governu no Parlamentu hanesan pilár soberania nian ne’ebé iha responsabilidade atu halo planeamentu, debate no aprovasaun ba Orsamentu Jerál Estadu nian, molok haruka ba Prezidente atu hetan promulgasaun”.
