………………………………………………………………………………………………………………
Díli, loron 29 fulan-dezembru tinan 2015
Komunikadu Imprensa
Sorumutuk Konsellu Ministrus nian iha loron 29 fulan-dezembru tinan 2015
Konsellu Ministrus hala’o sorumutuk iha tersa ne’e, loron 29 fulan-dezembru tinan 2015, iha sala sorumutuk Konsellu Ministrus nian, iha Palásiu Governu, iha Dili, no aprova ona Rezolusaun Governu nian ne’ebé kria Jardín Botániku Francisco Xavier do Amaral.
Haree ba objetivu no estratéjia hirak ne’ebé mak estabelese tiha ona iha Planu Estratéjiku Dezenvolvimentu tinan 2011-2030 nian, iha Programa Governu Konstitusionál VI no iha Estratéjia Nasionál Biodiversidade nian ne’ebé ko’alia kona-ba protesaun ambiente no konservasaun biodiversidade nian, Konsellu Ministrus aprova ona kriasaun Jardín Botániku Francisco Xavier do Amaral, iha aldeia Ai Merahun, Suku Asumau, Postu Administrativu Remexiu, iha Minisípiu Aileu.
Jardín Botániku ne’e sei instala no akompaña husi komisaun instaladora akompañamentu nian ida ne’ebé maka sei, iha instánsia dahuluk, define planu asaun nian, mekanizmu jestaun nian sira no regulamentu internu. Fatin ne’e, ho luan hamutuk ektar 28, no ninia objetivu prinsipál sira mak: estudu no investigasaun sientífika kona-ba rekursu fauna nian hirak ne’ebé existe iha ne’ebá, kriasaun banku semente no jermoplazma, konservasaun biodiversidade vejetál husi espésie nativa no exótika sira, liuliu hirak ne’ebé iha hela ameasa nia laran ka besik ona atu lakon, kombate hasoru estinsaun espésie vejetál sira, konxiensializasaun ba públiku ba valór husi diversidade biolójika nian no amesa hirak diversidade ne’e sujeita ba, no dezenvolvimentu asaun konkreta sira ba benefísiu husi ambiente, entre sira seluk.