IV GOVERNO CONSTITUCIONAL

SEKRETARIA ESTADU KONSELLU MINISTRUS

……………………………………………………………………………………………………………………………

KOMUNIKADU IMPRENSA

Soru-mutu Konsellu Ministrus iha loron 03 fulan Fevereiru tinan 2010

 

Konsellu Ministrus hala’o soru-mutu iha loron Kuarta ne’e, loron 03 fulan Fevereiru tinan 2010, iha sala Soru-Mutu Konsellu Ministrus nian, iha Palásiu Governu, iha Dili, no halo aprovasaun ba:

 

1. Dekretu Lei ne’ebé regula Emisaun ba Vistu

Dekretu Lei ida ne’e, ne’ebé hetan aprovasaun ho koresaun, atu limita sirkunstánsia sira iha ne’ebé estranjeiru ida bele rekere emisaun vistu vizita nian ka tránzitu nian, bainhira to’o ba iha Timor-Leste.

Iha postu sira fronteira terestre nian, sidadaun Indonézia nian sira de’it mak bele husu  Vistu Vizita nian ka Vistu Tránzitu nian, pasajeiru sira seluk hotu-hotu ne’ebé husu atu tama iha Timor-Leste, tenke hetan Vistu préviu ida molok to’o iha postu fronteria nian. Iha Aeroportu no Portu Internasionál sira vizitante estranjeiru sira no pasajeiru iha tránzitu nia laran, portadór sira  ho pasaporte ne’ebé emite husi país ne’ebé hetan ona autorizasaun, bainhira to’o iha Timor-Leste, bele husu Vistu Vizita nian ka Vistu tránzitu nian. Aprovasaun ba Diploma Legál ida ne’e halo haree ba faktu katak importante atu ezerse kontrolu ida ne’ebé efetivu kona-ba prezensa no permanénsia estranjeiru sira nian iha País, tanba ne’e, ohin loron, estranjeiru hotu-hotu bele husu Vistu ida ba vizita ka tránzitu, bainhira to’o iha Timor-Leste.

Maske nune’e, presiza atu hatene katak, pasajeiru sira ne’ebé mai hosi país oioin aprezenta nível risku nian no inkumprimentu rekizitu sira emigrasaun nian ne’ebé la  hanesan. Bainhira hala’o, desizaun ida kona-ba emisaun vistu nian ida bainhira to’o iha portu fronteira nian, la posivel hela de’it atu ezamina sirkunstánsia hotu-hotu ho risku boot husi pasajeiru sira. Rekerimentu sira ne’ebé sidadaun sira fo molok sira halo viajén mai Timor-Leste tenke konta didi’ak, no sei iha tempu disponivel atu rekere informasaun adisionál, bainhira de’it presiza, atu fundamenta di’ak liu desizaun vistu nian.

 

2. Rezolusaun ne’ebé Aprova Rejistu Saúde Familiár

Rejistu Saúde Familiár sei permite Ministériu Saúde atu adota ofisialmente prosedimentu rejistu nian kona-ba dadus saúde membru familiár ba iha nível Aldeia no Suku sira. Iha prátika, ida ne’e temi kona-ba feramenta ida ne’ebé permite atu hetan indikadór saúde nian sira no dertermina perfíl sanitáriu País nian atu bele dezenvolve medidas ne’ebé presiza atu promove di’ak liután prevensaun saúde nian.

Dadus sira ne’ebé Sistema Informasaun Saúde nian ofisialmente uza atu fó sai perfil saúde populasaun nian sei kontinua refere deit ba estimativa Sensus no la koresponde ba realidade atuál ne’ebé profisionál sira saude nian identifika. Ho medida ida ne’e, Ministériu Saúde hakarak hetan dadus lolós kona-ba saúde, iha Timor-Leste, ne’ebé sei sai nu’udar baze atu determina indikadór sira no trasa meta lolós hodi atinje no rekolla informasaun, hanesan:  númeru membru familiár  no faixa etária hirak ne’ebé kompoin família ida, kondisaun hela-fatin no distánsia husi postu sentru saúde ne’ebé besik liu, moras hirak ne’ebé mosu maka’as liu no tipu asisténsia ka akompañamentu médiku ne’ebé presiza akompaña ba família ida-ida, no seluk-seluk tan.

3. Dekretu-Lei ne’ebé aprova Lei-oan Komisaun Akompañemntu Prosesu Aprovizionamentu no Sekretariadu Tékniku Aprovizionamentu nian.

Komisaun Akompañementu Prosesu Aprovizionamentu no Sekretariadu Tékniku Aprovizionamentu hamriik iha sekuénsia atu halo desentralizasaun prosedimentu aprovizionamentu nian no kria atu alkansa prestasaun servisu ida ne’ebé di’ak-liu atu bele hetan efikásia no transaparánsia ida ne’ebé adekuada ne’ebé prosesu aprovizionamentu Estadu nian ida tenke halo tuir.

Nune’e, Komisaun Akompañamentu Prosesu Aprovizionamentu sei sai, liuliu, hanesan servisu ne’ebé kaer responsabilidade atu fiskaliza no akompaña prosesu aprovizionamentu no ezekusaun projetu sira no avaliasaun finál ba rezultadu sira, enkuantu Sekretariadu Tékniku Aprovizionamentu ninia misaun mak realiza prosesu aprovizionamentu  ba projetu sira ho valór dolar amerikanu millaun ida  ba leten , hanesan mós akompaña no fó asisténsia téknika ba prosedimentu sira seluk ne’ebé entidade públika sira realiza.

 

4. Rekolla raan.

Konsellu Ministrus hasai mós desizaun, katak, iha loron Sesta, loron 12 fulan Fevereiru, funsionáriu públiku sei la hala’o atividade limpeza nian hanesan baibain, maibé tenke bá sira nia servisu fatin hodi mantein iha ne’ebá.

 

Ministériu Saúde sei realiza kampaña ida kona-ba rekolla raan, iha loron ne’e, ekipa médika sira sei dezloka ba servisu públiku sira hotu atu rekolla raan, ba ida ne’e Governu husu ba funsionáriu hotu-hotu  atu iha disponibilidade hodi fó sira nian raan, haree tuir nesesidade ospitál nian, ho hanoin katak loron ida ita ida-ida sei presija raan ne’e.

Atividade limpeza sei hala’o fila-fali iha loron Sesta tuir mai, loron 19 fulan Fevereiru