Sorumutuk Konsellu Ministrus nian iha loron 22 fulan-dezembru tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 22 fulan-dezembru tinan 2015
Komunikadu Imprensa
Sorumutuk Konsellu Ministrus nian iha loron 22 fulan-dezembru tinan 2015
Konsellu Ministrus hala’o sorumutuk iha tersa ne’e, loron 22 fulan-dezembru tinan 2015, iha sala sorumutuk iha Palásiu Governu, iha Dili, no aprova ona:
1. Rezolusaun Governu nian kona-ba fó rai ba konstrusaun kompleksu oteleiru ida
Governu fó ba Pelican Paradise Holdings Timor-Leste direitu superfísie nian ba rai ida iha Tasi Tolu atu dezenvolve projetu investimentu nian. Empreza internasionál ne’e, ho nia sede iha Singapura, sei harii no esplora kompleksu oteleiru fitun lima nian ida, ho investimentu ida ho osan maizomenus dolar amerikanu millaun 310.
Projetu ne’ebé mak aprezenta uluk ba Governu Konstituisaun V, iha sorumutuk estradordinária Konsellu Ministrus nian iha loron 21 fulan-novembru tinan 2014, formula hikas fali, inklui otél ida ho kuartu 464, ne’ebé projetada atu kompete ho otél fitun lima sira ne’ebé di’ak liu iha rejiaun ne’e, entre instalasaun sira seluk ne’ebé iha kualidade no potensiál turístiku ne’ebé boot.
Formasaun rekursus umanus no kriasaun empregu hanesan prioridade ba investidor ne’e, ne’ebé prevé, iha faze konstrusaun nian, kria postu serbisu diretu besik rihun ida atus lima. no bainhira kompleksu ne’e hahú funsiona ona, investidór prevé sei kria no mantein postu serbisu nian hamutuk rihun ida atus tolu.
Konsellu Ministru analiza ona mós:
1. Polítika Nasionál Juventude nian
Sekretáriu Estadu Juventude no Desportu nian aprezenta ona ba Konsellu Ministrus Polítika Nasionál Juventude nian foun, iha ne’ebé deskreve kona-ba dezafiu sira, objetivu sira no projetu Estadu nian ba setór ida ne’e, ne’ebé maka abranje populasaun boot liu iha Timor-Leste. Ba elaborasaun dokumentu ne’e nian, Sekretaria Estadu konta ho partisipasaun ne’ebé boot husi juventude nasionál. Atu fó hanoin fila-fali katak Governu Konstitusionál VI tau ona Juventude hanesan alvu prinsipál ida mós husi polítika públika sira husi ho ninia programa, hodi subliña katak futuru Timor-Leste nian labele haketak husi futuru ninia juventude nian.
