Iha loron 11 fulan-dezembru tinan 2015, iha instalasaun Polísia  Sientífika Investigasaun Kriminál (PSIK), hala’o tiha ona  serimónia entrega sertifikadu kona-ba formasaun espesializada iha investigasaun kona-ba krime tráfiku droga ba formandu hamutuk 24 husi PSIK no majistradu na’in rua hosi Ministériu Públiku.

Asaun formasaun ne’ebé hala’o iha semana rua ne’e konta ho partisipasaun husi investigadór sira no husi peritu sira PSIK nian, no asegura hosi Inspetór-Xefe na’in-rua husi Polísia Judisiária Portugal, espesialista iha temátika ida ne’e. Ida-ne’e sai hanesan asaun ida tán husi asaun maizomenus sanulu ne’ebé hala’o iha síklu formativu biénio (tinan rua) 2015-2016 atu asegura formasaun téknika no dezenvolvimentu kapasidade iha área investigasaun kriminál, polísia sientífika no análize laboratoriál iha Timor-Leste.

Projetu ne’e tama iha Komponente Justisa husi Programa Apoiu nian ba Governasaun Demokrátika Timor-Leste, kooperasaun ne’ebé delega husi Uniaun Europeia iha Portugal iha Camões, I. P., ne’ebé, husikedas tinan 2012, no iha parseria ho Ministériu Justisa Timor-Leste, no ho entidade lokál sira seluk, akompaña ona kriasaun órgaun polísia kriminál nian foun ida ne’ebé iha espesialidadeaas tebes, iha área ida ne’ebé fundamentál ba dezenvolvimentu nasaun ne’e nian.

Polísia Sientífika Investigasaun Kriminál, harii iha tinan 2014, kompostu hosi investigadór 47 no peritu forense nian hamutuk 31, sira hotu formadu iha ámbitu programa ida ne’e nian, iha estratéjia ida ne’ebé hala’o liuhusi formasaun iha Timor-Leste no iha Eskola Polísia Judisiária nian, iha Portugal.