Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 16 fulan-dezembru tinan 2015

Parlamentu Europeu aprova Akordu kona-ba Vistu sira ho Timor-Leste

Durante horiseik-kalan, loron 15 fulan-dezembru, Parlamentu Europeu, iha Bruxelas, aprova ona akordu kona-ba livre vistu ba estadia (hela) ho durasaun badak entre Uniaun Europeia no Repúblika Demokrátika Timor-Leste nian. Akordu ne’e prevé kona-ba livre vistu ba sidadaun Repúblika Demokrátika Timor-Leste nian no Uniaun Europeia nian sira ne’ebé sei dezloka ba teritóriu entre Membru Estadu sira, to’o loron 90, iha periódu ida ho durasaun loron 180. Implementasaun livre vistu ba malu entre parte rua ne’e, nakloke ba ema husi kategoria hotu-hotu, la haree ba motivu husi ninia viajen, ho exesaun viajen atu hala’o atividade ne’ebé hetan remunerasaun, no vale ba nasaun hotu-hotu iha Uniaun Europeia ho ezesaun ba Reinu Unidu no Repúblika Irlanda, tanba nasaun rua ne’e la’os parte hosi “Espasu Schengen”.

Iha loron 26 fulan-maiu tinan ne’e, Vise-Ministru Negósiu Estranjeiru no Kooperasaun, Roberto Sarmento de Oliveira Soares, asina akordu ne’ebé vigora ona to’o agora ho karakter provizóriu, hodi hein aprovasaun hosi Parlamentu.

Justifikasaun husi relatora Uniaun Europeia nian ne’e esplika katak akordu ne’e “Sai hanesan oportunidade ida atu hodi valoriza relasaun ekonómika sira no ba turizmu” no fó sai katak “hetan tiha nia ukun rasik an, Timor-Leste rejista ona estabilidade demokrátika ida ne’ebé lalais tebes no merese hetan elojiu”. Relasaun parseria nian sira entre Uniaun Europeia no Timor-Leste “hatudu ona nia kualidade” no dehan katak akordu ne’e “sai hanesan pontu aas liu hosi aprofundamentu relasaun entre Uniaun Europeia no Repúblika Demokrátika Timor-Leste”.

Portavós Governu Konstitusionál VI, Ministru Estadu, Agio Pereira, afirma katak “Timor-Leste sauda votu ne’ebé maihusi maioria ida ne’ebé boot ne’ebé afavór ba akordu ne’e, iha kalan liubá ne’e, no hein ho esperansa ba vizita husi sidadaun sira husi UE mai ita nia páis, nune’e mós ho fasilidade hirak ne’ebé oferese ba sidadaun timoroan sira hodi tama ba-iha nasaun Uniaun Europeia nian sira. Aprovasaun husi Parlamentu Nasionál Europeu ba akordu ne’e reflete di’ak tebes ita-nia maturidade polítika no diplomátika, progresu ekonómiku no kapasidade husi ita-nia servisu imigrasaun nian sira, no ida ne’e hanesan votu konfiansa nian ida ne’ebé rekoñese ita-nia estabilidade nasionál, seguransa no valór demokrátiku sira.”