Soru-mutu Extraordinaria Konsellu Ministrus iha loron 30 fulan Janeiru tinan 2010
IV GOVERNO CONSTITUCIONAL
SEKRETARIA ESTADU KONSELLU MINISTRUS
.............................................................................................................................................
KOMUNIKADU IMPRENSA
Soru-mutu Konsellu Ministrus iha loron 30 fulan Janeiru tinan 2010
Konsellu Ministrus hala’o Soru-mutu estraordináriu iha Sábadu ne’e, loron 30 fulan Janeiru tinan 2010, iha Sala Soru-mutu Konsellu Ministru nian, iha Palásiu Governu, iha Dili, no halo aprovasaun ba:
1. Dekretu-Lei ne’ebé aprova Rejime Prosedimentu Espesiál kona-ba direitu atu hetan Kontratu Konstrusaun Sivíl ho Valór to’o $ 250.000 ba Empreza Lokál sira ho Sede iha Sub-distritu.
Dezenvolvimentu no kapasitasaun setór privadu nasionál merese atensaun espesiál husi Governu Konstitusionál IV, ne’ebé hakarak dudu emprezáriu sira atu organiza-an hodi partisipa di’ak liután iha konstrusaun Páis ne’e nian.
Hafoin reuniaun barak ne’ebé halo ho emprezariadu nasionál sira, Governu hakotu atu fo tulun konkretu ba estabelesimentu Kámara Komérsiu no Indústria nian, liu husi alokasaun verba ida iha Orsamentu Jerál Estadu nian ba tinan 2010. Tuir mós polítika ida ne’e mak Governu hakarak kria Banku Dezenvolvimentu nian ida atu setór privadu nasionál bele iha kapasidade atu investe iha área seluk ne’ebé bele kria empregu, ne’ebé la’ós de’it iha área konstrusaun nian.
Maibé, prátika hatudu katak aleinde konsentrasaun empreza sira nian ne’ebé maka’as liu iha Dili. Iha diferensa husi rejiaun ba rejiaun relasiona ho oportunidade atu hetan projetu. Projetu barak liu, iha sub-distritu no área remota sira, empreza sira iha Dili mak hetan, ne’ebé dala barak liu la halo hotu obra ka sub-kontrata fali grupu ki’ik sira ne’ebé buka empregu.
Kriasaun empregu lokál importante ba dezenvolvimentu normál país nian, tanba ne’e, importante atu fó obra konstrusaun sivíl ba empreza lokál sira ho sede iha sub-distritu. Ho dalan hanesan ne’e, empreza sira ne’e sei hetan oportunidade atu halo atuasaun, ho responsabilidade no koñesimentu, iha konstrusaun ba obra sira ne’ebé fó ba sira nia komunidade. Nune’e, iha posibilidade ba populasaun lokál atu partisipa iha prosesu fiskalizasaun ba obra sira ne’e, ne’ebé ikus mai sei serve ba sira no sira nia oan sira. Ho nune’e, timor-oan sira, ne’ebé organizadu, bele hetan motivasaun atu halo di’ak liután, hodi kria ambiente kompetisaun nian no fomenta atu empreza lokál di’ak sira bele hamriik.
Medida ida ne’e importante atu hametin ekonomia iha distritu sira, tanba ida ne’e bele garante katak populasaun lokál sei hetan benefísiu husi empregu iha projetu kona-ba harii edifísiu, hadi’a estrada, ponte ki’ik no dada bee ba sira nia komunidade, no sira seluk tan. Esperiénsia “Pakote Referendu” loke dalan atu koñese no halo avaliasaun ba empreza lokál sira, ne’ebé fasilita implementasaun ida ne’ebé efikáz liu husi Dekretu-Lei ida ne’e.
2. Abastesimentu fós
Abastesimentu Estratéjiku Nasionál Fós nian, ne’ebé Ministériu Turizmu Komérsiu no Indústria mak jere, merese atensaun espesiál, haree ba situasaun atuál merkadu fós nian, nune’e Konsellu Ministru halo aprovasaun atu hola fós tonelada rihun 30 to’o fulan Abríl tinan ne’e nian.
Antesipasaun abastesimentu nian ida ne’e ho hanoin atu previne ruptura ba stock fós nian ne’ebé bele mosu iha tempu oin mai iha país ne’e.
Konsellu ministru analiza mós:
1. Rejime Prosedimentu Aprovizionamentu
Prosesu implementasaun Rejime Prosedimentu Aprovizionamentu nian, aprezenta ona ba Konsellu Ministrus.
Ho hanoin katak Rejime Prosedimentu Aprovizionamentu nian, ne’ebé hetan aprovasaun iha reuniaun Konsellu Ministru nian ida uluk, introdúz medida balu kona-ba prosedimentu aprovizionamentu, ne’ebé haree liuliu kona-ba atu halo prosedimentu ne’e lais, klaru no efikáz liután.
