………………………………………………………………………………………………………………
Díli, loron 14 fulan-dezembru tinan 201
Komunikadu Imprensa
Sorumutuk estraordináriu Konsellu Ministrus nian iha loron 14 fulan-dezembru tinan 2015
Konsellu Ministrus hala’o sorumutuk estraordináriu segunda ne’e, loron 14 fulan-dezembru tinan 2015, iha sala sorumutuk Konsellu Ministrus nian, iha Palásiu Governu, iha Dili, no aprova ona:
1. Rezolusaun Governu nian kona-ba partisipasaun TIMOR GAP, E.P. nian iha operasaun petrolífera iha área eskluziva Timor-Leste nian
Diploma ida ne’e fó autorizasaun ba TIMOR GAP, E.P. hodi partisipa iha kontratu fahe produsaun ba bloku sira iha rai (“onshore”) no iha tasi (“offshore”) husi Área Eskluziva Timor-Leste nian, ho objetivu atu hamenus risku jeolójiku no atu hadi’a koñesimentu kona-ba potensiál idrokarbonetu ne’ebé iha.
Agora daudaun, Timor-Leste iha de’it projetu sira iha Área Dezenvolvimentu Petrolíferu Konjuntu nian. Tanba ne’e, presiza atu hakle’an koñesimentu kona-ba rekursu sira ne’ebé eziste iha Área Eskluziva, liuhusi promosaun atividade prospesaun no peskiza nian sira, ne’ebé inklui realizasaun estudu iha área sira ne’ebé maka konsidera importante. Rezultadu sira husi estudu ne’e sei iha papél importante hodi dada investimentu ne’ebé mak presiza hosi empreza petrolífera internasionál sira ba iha área ne’ebé tama ba jurizdisaun Estadu Timor-Leste nian.
2. Dekretu Governu nian kona-ba pagamentu suplementár ba funsionáriu sira hala’o serbisu ba prosesu Orsamentu Jerál Estadu nian ba tinan 2016 no efexu Konta Estadu nian ba tinan 2015
Preparasaun Orsamentu Jerál Estadu nian ba tinan 2016 nian no fexu tinan finanseiru tinan 2015 hasa’e volume serbisu nian ne’ebé liu ona númeru oras ne’ebé maka hatuur tiha ona iha lei, inklui oras estraordinária 40 kada fulan. Tamba ne’e, tuir polítika rekoñesimentu nian ba dedikasaun profisionál no insentivu ba funsionáriu ne’ebé, iha ámbitu serbisu ida ne’e nian, distinge an liuhusi kumprimentu ezemplár ba sira-nia obrigasaun ho grau efisiénsia, inovasaun no méritu profesionál ne’ebé aas, Governu aprova tiha ona atu selu suplementu ida ba funsionáriu sira ne’e.