Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 30 fulan-novembru tinan 2015

Loron Proklamasaun Independénsia no selebrasaun tinan 500 interasaun Timor/Portugál iha país tomak

Sábadu liu-bá, loron 28 fulan-novembru, selebra tiha ona, Aniversáriu Proklamasaun Independénsia da-40 iha territóriu tomak, Loron ida ne’e mós hanesan pontu ne’ebé mak aas liuhusi komemorasaun tinan 500 interasaun entre Timor-Leste no Portugal [Portugál] no halo afirmasaun identidade Timor nian, hodi hala’o eventu boot sira iha Oe-Cusse Ambeno [Oekusi Ambenu] no iha Díli.

Besik ba-iha Loron Proklamasaun Independésia, Primeiru-Ministru, Rui Maria Araújo, hato’o iha ninia diskursu ida katak, Lifau fatin uluk nian ne’ebé kapás tebes hodi halibur bainaka sira, mai hosi nasaun oin-oin, tanba iha ne’ebá maka, iha tinan 500 liubá, navegadór portugés sira atraka  sira ninia ró-ahi no sira harii iha ne’ebá kapitál  Timor Portugés ba dahuluk.

Iha  biban ne’e, Primeiru-Ministru timoroan ne’e mós agradese ba Portugál ba esforsu diplomátiku sira apoiu nian ba independénsia, durante funu tinan 24 nia laran, no kontribui hodi hametin lasu amizade no solidariedade  Timor-Leste nian iha Comunidade de Países de Língua Portuguesa – CPLP [Komunidade País sira  Lia-Portugés] nia laran.

Xefe Governu hatete katak, rekoñese tempu dahuluk nian, halo ita hatene no hahii “  ba buat hirak ne’ebé halo ita ohin loron sai nu’udar povu ida, ita-nia identidade no ba buat hirak ne’ebé mak ita hetan tiha ona hosi nia”, atu “ita laran metin hodi hakarak hetan barak liután iha tempu oin mai ”, iha futuru ida ne’ebé “ita, timoroan sira, maka sei  sai nu’udar matadalan ba ita-nia destinu”.

Portavós Governu Konstitusionál VI nian, Ministru Estadu Agio Pereira, hateten katak “maski iha buat barak  negativu ne’ebé mai-husi kolonizasaun ida tinan atus lima nia laran nian, maibé Timor hatudu ninia identidade kulturál  úniku, ne’ebé lori ba proklamasaun ita-nia independénsia iha loron 28 fulan-novembru tinan 1975 no hafoin, ikusmai, hakotu, bainhira liu-tiha tinan 24 resin liuhusi terus no funu,  Timor-Leste bele sai duni nu’udar membru Nações Unidas [Nasoins Unidas] nian ba da-191, iha tinan 2002.FIN