Governu Timor-Leste

IV GOVERNO CONSTITUCIONAL

SEKRETARIA ESTADU KONSELLU MINISTRUS

.............................................................................................................................................

KOMUNIKADU IMPRENSA

Reuniaun Konsellu Ministrus iha loron 6 fulan Janeiru tinan 2010

Konsellu Ministru hala’o soru-mutu iha loron Kuarta ida ne’e, loron 6 fulan Janeiru tinan 2010, iha Sala Soru-mutu Konsellu Ministrus nian, iha palásiu Governu, iha Díli, no aprova:

1. 1. Rezolusaun kona-ba loke konkursu públiku ba integrasaun iha Rejime Jerál karreira nian iha Administrasaun Públika ba Traballadór Kontratadu sira ba termu certo ne’ebé ezerse funsaun nu’udar profesór iha Sistema Edukasaun no Ensinu Pré-Eskolár, Báziku no Sekundáriu Timor-Leste nian.

Husi kedan independénsia iha nesesidade atu absorve traballadór ba knaar hanorin nian, maske tranzitóriu de’it, iha tempu ne’ebé hanesan mak dezenvolve planeamentnu ba sistema edukativu no Ordenamentu Jurídiku Timor nian. Traballadór sira ne’e barak, simu kontratu ba termo certo iha tinan balu liubá husi Administrasaun Públika ba knaar hanorin nian, ohin loron hetan espetativa lejítima atu hetan rekoñesimentu, ho karater permanente, ninia empeñu no dedikasaun  ba Nasaun nia dezenvolvimentu.

Tuir Lei determina  katak funsionáriu ho vínkulu permanente iha Administrasaun Públika de’it mak iha direitu ba Karreira, nune’e atu tama iha Karreira Administrasaun Públika nian bele halo de’it hafoin konkursu kona-ba prestasaun prova nu’udar parte husi prosesu selesaun nian ida ne’ebé bazeia ba méritu; nomós, direitu no devér funsionáriu públiku sira nian, asesu ba formasaun no kapasitasaun  profisionál, hanesan mós avaliasaun ba dezempeñu, Konsellu Ministru determina ona atu loke konkursu públiku atu tama iha Rejime Jerál Administrasaun Públika ba traballadór kontratadu sira ba termo certo ne’ebé erzerse sira nia funsaun nu’udar profesór iha Sistema Edukasaun no Ensinu Pré-eskolár, Báziku no Sekundáriu Timor-Leste nian.

Konsellu Ministru analiza mós:

1. 1. Aprezentasaun no diskusaun kona-ba Planu Asaun Lejislativa ba semestre da-1 tinan 2010.

Iha reuniaun dahuluk tinan foun ida ne’e nian, Konsellu Ministrus hahuu dezeña prioridade sira, tuir área sektoriál sira, kona-ba Planu Asaun Lejislativa, ne’ebé define konjuntu diploma lejislativu no regulamentár sira ne’ebé atu aprova to’o fulan Juñu tinan 2010.

1. 2. Aprezentasaun kona-ba planu Promosaun iha PNTL

Prosesu promosaun nian, ne’ebé hahuu iha semana ida ne’e iha Polísia Nasionál Timor-Leste nia laran, aprezenta ona, iha detallu, ba Konsellu Ministrus. Planu, ne’ebé Komisaun Promosaun nian halo tuir lejislasaun ne’ebé vigora hela, ninia objetivu mak identifika kapasidade husi ajente sira autoridade nian, liu husi teste ne’ebé sei halo ba elementu sira hotu, no prosede ba promosaun no alterasaun salariál hirak ne’ebé presija iha PNTL.