Ministru Estadu no Prezidensia Konsellu Ministrus nian, Agio Pereira, no Ministru Estadu, Koordenadór Asuntu Sosiál no Ministru Edukasaun, António da Conceição, partisipa iha konferénsia bianuál “Timor-Leste Update”, husi Universidade Nasionál Austrália nian (Australian National University), iha Kamberra, iha loron 19 fulan-novembru. Ministru Estadu na’in rua ne’e hato’o diskursu, iha Profesór Universitáriu sira, Funsionáriu Públiku sira, estudante sira no parseiru ba dezenvolvimentu rejiaun ne’e tomak nia oin.

Ministru Estadu Agio Pereira ko’alia kona-ba dezenvolvimentu Timor-Leste nian iha kontestu istóriku, hodi dehan “ami nia pasadu koloniál, ami-nia forma governasaun nian agora, doutrina konsensu demokrátiku nian no, klaru, prioridade sira ami nia nasaun nian ba tinan hirak oin mai ne’e”. Ministru ne’e ko’alia mós kona-ba kestaun fronteira marítima, hodi reafirma tan katak “ami iha esperansa katak Primeiru-Ministru foun Austrália nian, Malcolm Turnbull, sei revee pozisaun husi ninia Governu no oferese ba Timor-Leste oportunidade ne’ebé hanesan atu define fronteira marítima ne’ebé maka Governu Austrália nian sira uluk fó ona ba nasaun viziñu Austrália nian sira seluk”. No nia hatutan katak: “Buat hotu ne’ebé maka Timor-Leste tenta buka hela ho Austrália maka solusaun ida ne’ebé justa, tuir Direitu internasionál.”

Iha nia diskursu, Ministru Estadu António da Conceição ko’alia kona-ba kompromisu Governu nian hodi “hametin dezenvolvimentu sosiál iha Timor-Leste laran tomak”, kompromisu ida ne’ebé hatudu tantu iha Planu Estratéjiku Dezenvolvimentu nian nune’e mós  iha Programa Governu Konstitusionál VI “hodi fó hatene kona-ba promosaun dezenvolvimentu no moris-diak ne’ebé orienta ba populasaun, liuliu ki’ak sira, vulneravel no ema sira ne’ebé ladún hetan atensaun”. Iha nia diskursu aprezenta ona inisiativa balun iha área Asuntu Sosiál, no salienta nia viabilidade no “rezultadu konkretu sira ba populasaun”.

Ministru Estadu na’in rua ne’e partisipa iha sesaun husu no hatán nian, ne’ebé hetan apresiasaun maka’as husi konvidadu sira.

Iha loron 19 fulan-novembru kalan, Ministru Estadu sira partisipa iha Selebrasaun Aniversáriu ba Proklamasaun Independénsia Timor-Leste nian da-40, ne’ebé hala’o iha Muzeu Nasionál Austrália nian, hamutuk ho Embaixadór Timor-Leste nian iha Austrália Abel Guterres, Konsúl Jerál Darwin nian, Francisco Filipe no konvidadu atus resin,.

Embaixadór Guterres aproveita oportunidade ne’e hodi ko’alia kona-ba relasaun bilaterál nian sira ne’ebé Timor-Leste mantein ho Austrália no hatudu ligasaun ne’ebé di’ak tebes entre populasaun. Nia mós observa katak, “hanesan viziñu, belun no aliadu, Timor-Leste fiar nafatin katak Australia ho Timor-Leste bele rezolve konflitu delimitasaun iha ita-nia fronteira marítima nian sira”.