Primeiru-Ministru Governu Konstitusionál VI nian, Dr. Rui Maria de Araújo, inagura loron 14 novembru,  Polo Politécnico [Polo Politékniku]  hosi Universidade Nasionál Timor-Lorosa’e (UNTL), iha Betanu , postu Administrativu Same, Munisípiu Manufahi. Obraida ne’e lansa simbólikamente hosi eiz Primeiru-Ministru Kay Rala Xanana Gusmão iha tinan tolu liu-bá.

 Iha ninia diskursu, Xefe Governu deklara katak “dezenvolvimentu sósiuekonómiku Timor-Leste nian sei halo parte setór bo’ot haat – agrikultura, turizmu, indústria petróleu no Infraestrutura tanbane’e edukasaun iha Timor-Leste tenke hahú diresiona sira nia aan atu forma ema ne’ebé bele serbisu iha área hirak ne’e.”

Hafoin  halo tihaestensaun ida ne’e ba instalasaun UNTL nian ba Betanu no mós iha rejiaun sira selukatu fasilita joven sira bele hetan edukasaun nível superiór nian iha munisípiu sira no la presiza sira atu muda ba kapitál Dili atu kontinua sira nia estudu.

Rui Maria de Araújo hatete katak estudante graduadu sira iha Betanu sai husi universidade ho kapasidade  duni atu bele halo servisu. “Ida ne’e siginifika katak bainhira remata ona  kursu Agrikultura Polo Politékniku Betanu nian tenke hatene prodúz produtu agríkola sira. Se ita sai hosi kursu Enjeñaria tenke hatene hala’o serbisu iha ita-nia área,  tanba Ita boot sira hatene katak prosesu  dezenvolvimentu sei la pára. Ita sei presiza enjeñeiru barbarak, ita sei presiza tékniku diploma I, II no III iha área konstrusaun sivil, marseneiru soldadór no seluk-seluk tan.”

Ba dosente sira, Xefe Ezekutivuhatete katak tenke dezenvolve kurríkulu sira hodi orienta estudante sira ne’ebé iha ligasaun ba merkadu de traballu atu nune’e ema sira ne’ebé sai hosi Polo Politékniku Betanu nian bele hatene halo serbisu iha área espesifika hirak ne’e.

Primeiru- Ministru hatutan mós katak, dezenvolvimentu iha Timor-Leste presiza aumenta nafatin formasaun ba ema barak atu ema sira   ne’e bele   hatene halo servisu iha área soldadura, konstrusaun, karpintaria, agrikultura, no  petróleu nian.

Xefe Governo  kongratula ba kooperasaun di’ak Ministériu Edukasaun ho  UNTL ba-iha realizasaun planu hodi harii projetu akadémiku iha Betanu.

Ikus liu, Rui Maria de Araújo fó mós parabéns ba Munisípu Manufahi tanba kolabora ona ho projetu importante iha polo edukativu ne’e. Iha esperansa katak joven sira ne’ebé daudaun ne’e  tuir kursu iha instituisaun ne’e iha  tinan hirak oin mai bele hahú graduasaun no bele hahú serbisu ho projetu barbarak ne’ebé la’o daudaun iha Manufahi no iha parte Kosta Sul territóriu nasional nian.

Durante serimónia abertura nian, Primeiru-Ministru  assina plaka no tesi fita iha odamatan-tama ba kampus Polo Politékniku akompaña husi Ministru Edukasaun Sr. António Conceição, Reitór UNTL Aurélio Guterres, PhD, Administradór sira husi Munisípiu Ainaru, Manatutu, Same, Suai, no, Lídere Komunitáriu sira, estudante sira UNTL nian,  no diretór sira eskola Sekundária husi respetivu munispiu sira.

Durante deslokasaun, Rui Maria de Araújo  hala’o  vizita ba Sentru Saúde Same no  Betanu nian, no mós ba Sentrál Elétrika Betanunian.