Iha loron 16 fulan-novembru tinan 2015 liubá, hala’o ona iha Dili serimónia entrega formál ekipamentu sira ba laboratóriu Polísia Sientífika (LPC-sigla iha lia-portugés), Unidade Móvel espesiál rua no diploma partisipasaun nian sira iha Kursu Atualizasaun Formasaun ba  Sientífika – Identifikasaun Judisiária, Lofoskopia no Análize kona-ba Sena Krime nian.

Konkretizasaun ba aktu fó ekipamentu ba Laboratóriu Polísia Sientífika nian, inklui disponibilizasaun unidade móvel sira, importante ba investigasaun judisiál. Tanba ne’e agora iha ona kapasidade efetiva atu ezekuta análize sientífika espesífika sira, ne’ebé bele sai hanesan prova iha tribunál, ne’ebé reprezenta kapasidade  intervensaun nian ida ne’ebé boot liután husi polísia kriminál timoroan nian.

Instalasaun laboratóriu ne’e nian hahú iha fulan-outubru tinan 2015, iha servisu hamutuk ho Polísia Judisiária Portugál nian.

Formasaun iha Polísia Sientífika ida ne’e dura semana haat no konta mós ho prezensa husi peritu forense nian sira husi LPC Portugál nian. Asaun ida ne’e hanesan parte husi siklu formasaun nian iha tinan 2015-2016, ne’ebé buka atu hasa’e koñesimentu tékniku sira no dezenvolvimentu kompeténsia nian iha área investigasaun kriminál, polísia sientífika no análize laboratóriu sira nian iha Timor-Leste.

Atu hatete liután katak, Diresaun Nasionál Polisía Sientífika Investigasaun Kriminál nian, konta hahú kedas iha inísiu fulan-novembru nian, ho asesoria foun ida, ne’ebé asegura hosi Inspetór-Xefe Polísia Judisiáriu Portugál nian ida, ne’ebé mai serbisu hamutuk ho sira ne’ebé maka hala’o tiha ona funsaun dezde tinan 2012, iha ámbitu investigasaun kriminál nian.  

Atividade hirak ne’e halo parte hotu iha Komponente Justisa nian husi Programa Apoiu nian ba Governasaun Demokrátika Timor-Leste, kooperasaun ne’ebé delega hosi Uniaun Europeia iha Portugál iha Camões, IP. Hahú kedas iha tinan 2012, no serbisu hamutuk ho Ministériu Justisa no entidade sira seluk Timor-Leste nian, programa ne’e akompaña ona kriasaun órgaun polísia kriminál nian ida ho espesializasaun ne’ebé mak aas, iha área ida ne’ebé importante tebes ba dezenvolvimentu nasaun nian.

Polísia Sientífika Investigasaun Kriminál nian, kria iha tinan 2014 mak Investigadór na’in 47 no peritu na’in 31. Ninia formasaun realiza ona iha Timor-Leste no iha Portugál, iha Eskola Polísia Judisiária nian.

Iha Serimónia entrega ekipamentu  no sertifikadu kursu nian sira ne’e marka mós prezensa Ministru Estadu, Koordenadór Asuntu Administrasaun Estadu no Justisa, Dionísio Babo, Ministru Justisa, Ivo Valente, Embaixadór Portugál nian iha Dili, Manuel Gonçalves de Jesus, reprezentante sira husi órgaun soberania Timor-Leste nian sira, reprezentante husi Delegasaun Uniaun Europeia, Defensór Públiku Jerál, Sérgio Hornai, Provedór Direitus Umanus no Justisa, Silvério Pinto Baptista, no reprezentante sira husi Komandu-Jerál Polísia Nasionál Timor-Leste nian.