Governu Timor-Leste, liuhusi Ministériu Saúde Repúblika Demokrátika Timor-Leste (RDTL), fó sai rezultadu peskiza dahuluk kona-ba ai-han no nutrisaun tinan 2013. Lansamentu ne’e hala’o ofisialmente husi Vise-Ministra no Ministra Saúde Interina, Ana Isabel Soares, iha Otél Timor Dili, iha loron 13 fulan-oOutubru 2015.
Peskiza ne’ebé hetan apoiu husi UNICEF no Governu Austrália, abranje uma-kain 9.547 iha aldeia 528 iha munisípiu hotu-hotu. Objetivu husi peskiza ne’e, hodi halo avaliasaun kona-ba estatutu nutrisionál feto no labarik sira-nian, no fatór risku sira husi malnutrisaun, inklui prátika fó han kosok-oan no labarik sira, prátika ijiéne no saneamentu sira, no espozisaun ba aflatoksína (substánsia tóxika ne’ebé bele halo kontaminasaun ba ai-han).
Reprezentante UNICEF, Desiree Jongsma hateten, rezultadu peskiza ne’e simples, maibé iha efeitu ne’ebé signifikativu. Bele hamenus desnutrisaun no bele aumentu fó susu-oan, sertamente lori notisia di’ak ba labarik sira iha Timor-Leste.
“ Ba futuru ida-ne’ebé di’ak liubá labarik sira hotu, ba sira-nia família, ba komunidade no ba nasaun ne’e, fundamentál tebes atu habelar parseria ho multi-setorál sira atu investe kedas ai-han no nutrisaun iha labarik sira no ba kosok oan ne’ebé foin morisatu nune’e sira bele dezenvolve ho lalais,” nia hatete.
Iha parte seluk, Vise-Ministra no Ministra Saúde Interina, iha nia intervensaun sente orgullu kona-ba traballu relatóriu peskiza nian no agradese ba parseiru sira, hodi Governu Timor-Leste nian naran, liu-liu ba UNICEF no Governu Australia nian. Nia agradese mós ba ekipa Southeast Asian Ministers of Education Organization - Regional Centre for Food and Nutrition (SEAMEO-RECFON), ne’ebé involve an ba-iha prosesu ne’e hotu.
Tuir Ana Isabel Soares, rezultadu husi peskiza ne’e sei iha kontinuidade ba-iha planu no implementasaun programa nutrisaun, atu kria baze de dadus hodi akompaña progresu sira. Tuir inisiativa Governu nian atuhodi hadi’a situasaun nutrisaun iha Timor-Leste. “ Relatóriu ida-ne’e submete mós ba sorumutuk Konsellu Ministru, ne’ebé hetan rekomendasaun atu hala’o estudu inter-ministeriál, hodi identifika fonte no nível aflatoksína nian sira iha hahan no atu kria planu asaun ida hodi hamenus espozisaun ba perigu ida ne’e.