Timor-Leste ho Indonézia, iha loron 29 no 30 fulan-outubru 2015, hala’o sorumutuk konsulta daruak kona-ba fronteira marítima iha Surabaya, Indonézia. Objetivu hosi sorumutuk ne’e, hodi diskuti termu referénsia (ToR) no planu traballu ba prosesu delimitasaun fronteira marítima permanente entre Timor-Leste ho Indonézia.

Sorumutuk ida ne’e tuirsorumutuk dahuluk nian, ne’ebé hala’o ona iha loron 18 fulan-setembru 2015 iha edifísiu Ministériu Negósiu Estranjeiru no Kooperasaun iha Dili.

“Iha biban ida ne’e, parte rua konkorda ona, kona-ba termu reférensia no planu traballu sira,  sai nu’udar baze hodi hahú prosesu negosiasaun dahuluk kona-ba delimitasaun fronteira marítima permanente,” dehan Francisco Cepeda, Sekretáriu-Jerál MNEK nian. Prosesu delimitasaun fronteira marítima entre Timor-Leste ho Indonézia sei bazeia ba direitu internasionál, partikularmente UNCLOS ka Konvensaun Nasoens Unidas nian kona-ba Direitu Tasi nian (CNUDM ne’ebé koñesidu mós ho akrónomu inglés UNCLOS.

Sorumutuk konsulta hirak ne’e, nu’udar asaun konkreta hosi parte rua hodi fó seguimentu ba deklarasaun husi Prezidente Repúblika Indonézia, Joko Widodo no Primeiru-Ministru Timor-Leste, Rui Maria de Araújo, ne’ebé  hato’o durante vizita ofisial bá Jakarta, Indonézia, iha loron 26 fulan-agostu 2015.

Delegasaun Timor-Leste lidera hosi Francisco Cepeda, Sekretáriu-Jerál Ministériu Negósiu Estranjeiru no Koperasaun Timor-Leste, konta mós ho prezensa ofisiál sira husi Ministériu Negósiu Estranjeiru no Koperasaun, husi Prezidensia Repúblika no m’os husi Gabinete Fronteira Maritima.