………………………………………………………………………………………………………………
Díli, loron 20 fulan-outubru tinan 2015
Sorumutuk Konsellu Ministrus nian iha loron 20 fulan-outubru tinan 2015
Konsellu Ministrus hala’o sorumutuk tersa-feira ne’e, iha loron 20 fulan-outubru tinan 2015, iha sala sorumutuk Konsellu Ministrus nian, iha Palásiu Governu, iha Díli, no aprova ona:
1. Dekretu-Lei ne’ebé estabelese Orgánika Ministériu Edukasaun
Orgánika ne’ebé hetan ona aprovasaun ne’e mantein, iha parte barak, estrutura Ministériu Edukasaun nian, hodi reforsa área sira dezenvolvimentu kurrikulár, avaliasaun ba alunu sira no área planeamentu, monitorizasaun no avaliasaun nian.
Governu iha kompromisu hodi reforsa planeamentu ne’ebé adekuadu, koordenasaun institusionál, rekursu umanu no infraestrutura edukativu sira, nune’emós jestaun administrativa no finanseira di’ak ba estabelesimentu edukasaun no ensinu nian, hodi hala’o serbisu hirak ne’ebé di’ak liu iha setór Edukasaun nian.
2. Rezolusaun Governu nian ne’ebé kria Parké Nasionál Kay Rala Xanana Gusmão
Parke Nasionál Kay Rala Xanana Gusmão harii iha Zona Protejida Foho Kablaki, Munisípiu Ainaro nian, postu administrativu Hatu Udo, nu’udar instrumentu esensiál ba valorizasaun Rezisténsia no nia estrutura tripartida. Ninia objetivu atuhodi prezerva fatin simbóliku ida ne’ebé importante tebes ba memória koletiva luta ba libertasaun povu Timor-Leste no sakrifísiu husi sira ne’ebé maka mate ba Pátria.
3. Rezolusaun Governu ne’ebé aprova Lista Dalan sira nia naran ba sidade Dili
Haree katak kreximentu ne’ebé lais tebes sidade Dili nian tuir demográfiku no abitasionál, Governu aprova lista naran ba Avenida no Estrada nian sira iha kapitál timór nian. Naran fatin sira nian sai nu’udar elementu importante ida ba identifikasaun, orientasaun, komunikasaun no lokalizasaun ba edifisiu hotu-hotu iha teritóriu nian, hodi kontribui atu otimiza tantu ba área sira servisu nian no moos ba ordenamentu teritóriu ida ne’ebé mak efisiente liu.
Atribuisaun fatin sira nia naran ne’ebé aprova ona sei funsiona iha faze dahuluk ba-iha suku pilotu neen: suku Kolmera, suku Motaél, suku Gricenfor, suku Vila Verde, Suku Akadiruhun no suku Bidau Lesidere.
4. Rezolusaun Governu nian ne’ebé aprova Protokolu entre Ministériu Finansa Portugál no Ministériu Finansa Timor-Leste nian kona-ba Programa Integradu Parseria nian iha Asisténsia Téknika ba-iha área Finansa Públika no ninia aneksu no adenda sira
Tuir nesesidade atu intensifika kooperasaun téknika iha área Finansa Públika entre Timor-Leste no Portugál no hodi reforsa rekursu umanu nasionál nian sira, Governu aprova Protokolu Ministériu Finansa entre nasaun rua.
5. Rezolusaun kona-ba apoiu ba prosesu resenseamentu eleitorál Repúblika Demokrátika Saun Tomé no Prínsipe nian
Tuir pedidu apoiu ne’ebé maka halo husi Komisaun Nasionál Eleisaun no husi Governu Repúblika Demokrátika Saun Tomé no Prínsipe nian, Governu timorense aprova akizisaun kit hamutuk rua-nulu husi ekipamentu informátiku no ninia programa software nian, hodi fó apoiu ba organizasaun no ezekusaun prosesu resenseamentu eleitorál nian.
Pedidu ne’e tuir Akordu Kooperasaun ne’ebé hala’o ona entre nasaun rua ne’e, iha loron 21 fulan-jullu tinan 2014, hodi hametin Páz no ba dezenvolvimentu sustentável Estadu Direitu nian. Eleisaun prezidensiál sira ne’ebé tau ona iha ajenda ba hahú tinan 2016 nian.
6. Rezolusaun kona-ba apoiu ba prosesu referendáriu no eleitorál iha Repúblika Sentru Afrikana
Governu timorense aprova tiha ona hodi fó apoiu finanseiru ba prosesu eleitorál no referendáriu ba Repúblika Sentru Afrikana, hatudu esforsu Timor-Leste nian hodi hametin inisiativa g7+ nian ba promosaun reziliénsia no dezenvolvimentu ba Estadu Frágil sira. Eleisaun prezidensiál no parlamentár nian sira sei hala’o iha fulan-outubru ne’e.
7. Proposta Orsamentu Jerál Estadu tinan 2016 nian
Governu aprova tiha ona proposta Orsamentu Jerál Estadu (OGE) nian ba tinan 2016, ne’ebé mak inklui reseita no despeza sira hotu no kobre poríodu husi loron 1 fulan-janeiru no loron 31 fulan-dezembru tinan 2016. Proposta ida ne’e sei hato’o ba Parlamentu Nasionál atu hetan aprovasaun.