Sorumutuk estraordináriu Konsellu Ministrus nian iha loron 12 fulan-outubru tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 12 fulan-outubru tinan 2015
Sorumutuk Estraordináriu Konsellu Ministrus nian iha loron 12 fulan-outubru tinan 2015
Konsellu Ministrus hala’o sorumutuk iha segunda ne’e, loron 12 fulan-outubru tinan 2015, iha sala sorumutuk Konsellu Ministrus nian, iha Palásiu Governu, iha Dili, no aprova ona:
1. Rezolusaun Governu nian Renova Mandatu Prezidente Konsellu Administrasaun TIMOR-GAP, E.P nian
Tuir Dekretu-Lei n.u6/2015, loron 11 fulan-marsu, Konsellu Ministrus aprova ona renovasaun mandatu Sr. Fransisco da Costa Monteiro nian, hanesan Prezidente Konsellu Administrasaun no Prezidente Diresaun Ezekutiva TIMOR GAP, E.P. nian, ba mandatu foun ida ho durasaun tinan haat.
TIMOR GAP, EP mak empreza nasionál mina-rai Timor-Leste nian ida, ne’ebé harii iha tinan 2011, ho objetivu, hanesan reprezentante Governu nian, atu hala’o negósiu iha setór Mina-rai no Gás nian.
2. Rekomendasaun atu prolonga Señór Xefe Estadu Maiór Jenerál no Vise-Xefe Estadu Majór Jenerál F-FDTL nian
Bazeia ba Dekretu-Lei n.u7/2014 fulan-marsu – Estatutu Militár F-FDTL nian – Konsellu Ministrus aprova ona Rekomendasaun atu renova fali mandatu Xefe Estadu Maiór Jenerál F-FDTL, Majór-Jenerál Lere Anan Timur (Tito da Costa Cristovão), no Vise-Xefe Estadu Majór Generál F-FDTL, Brigadeiru-Jenerál Filomeno Paixão de Jesus.
Konsellu Ministrus analiza mós:
1. Proposta Orsamentu Jerál Estadu tinan 2016
Governu halo análize dahuluk ida kona-ba projetu lei Orsamentu Jerál Estadu (OJE) ba tinan 2016, ne’ebé mak inklui reseita no despeza sira hotu no kobre períodu entre loron 1 fulan-janeiru no loron 31 fulan-dezembru tinan 2016 nian.
2. Aprezentasaun kona-ba programa Komemorasaun tinan 500 no Afirmasaun Identidade Timor nian
Ministru Administrasaun Estatál, hodi komisaun organizadora komemorasaun ninia naran, aprezenta ona ba Konsellu Ministrus orsamentu ba programa atividade sira nian atubele hetan apresiasaun. Atividade sira ne’e dezenvolve hela tuir abordajem istórika, kultura no intelektuál ida, ne’ebé foka liu ba papél igreija katólika nian iha istória Timor-Leste nian.
