Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 8 fulan-outubru tinan 2015

Primeiru-Ministru no delegasaun fila husi Kuba hafoin vizita ofisiál

Primeiru-Ministru no nia delegasaun fila dadaun ona mai Timor-Leste hafoin remata ohin, vizita ofisiál ba Kuba ho susesu. Vizita ne’e hahú iha loron 2 fulan-otutubru nian, depoizde Primeiru-Ministru partisipa iha Simeira Nasoins Unidas nian kona-ba Dezenvolvimentu Sustentavel no iha Asembleia Jerál Nasoins Unidas nian iha Nova Iorke.

Delegasaun ne’ebé halo vizita ofisiál ba Kuba inklui Ministru Estadu, Koordenadór Asuntu Sosiál no Ministru Edukasaun, António da Conceição, Ministru Negósius Estranjeirus no Kooperasaun, Hernâni Coelho, Ministra Saúde, Maria do Céu Pina da Costa no Embaixadór Timor-Leste nian ba Kuba, Olímpio Branco.

Bainhira to’o, Rui Maria de Araújo hato’o kumprimentus husi Prezidente Timor-Leste nian no realsa kona-ba relasaun forte ne’ebé eziste ona to’o oras ne’e entre Timor-Leste no Kuba, husi kedas loron Restaurasaun Independénsia nian, iha loron 20 fulan-maiu tinan 2002, iha ne’ebé relasaun diplomátika sira hahú estabelese. Kuba fó ona, to’o oras ne’e, apoiu ida ne’ebé signifikativu ba Dezenvolvimentu Timor-Leste nian, liu-liu iha setór Saúde, Edukasaun no Desportu nian.

Ajenda delegasaun ne’e nian inklui vizita sira ba Sentru Enjeñaria Téknika no Bioteknolojia, ba Universidade Siénsia ba Kultura Fízika no Desportu no ba Muzeu Eroi Nasionál José Martí. Sai mós hanesan foku ba delegasaun maka eskola sekundária, sentru agríkola no estabelesimentu médiku nian balun, atubele atinje objetivu vizita ne’e nian, ne’ebé Rui Maria de Araújo anunsia bainhira to’o: “ami mai iha Kuba atu aprende, atu dezenvolve.”

Primeiru-Ministru no nia delegasaun hasoru malu ho lider Kuba nian sira, inklui Prezidente Konsellu Estadu Repúblika Kuba nian, Raul Castro no Prezidente Asembleia Nasionál Podér Populár, Esteban Lazo Hernández.

Delegasaun timoroan ne’e sente satisfeitu tanba bele hasoru malu formadór no médiku Kuba nian hirak ne’ebé uluk hala’o knaar iha Timor-Leste, nune’e mós ho timoroan sira ne’ebé oras ne’e daudaun tuir hela formasaun médika nian iha Kuba.

Portavós Gvernu nian, Ministru Estadu Agio Pereira, realsa katak “vizita ofisiál ba Kuba ne’e hametin amizade besik ne’ebé iha tiha ona entre ita nia nasaun rua ne’e. Ida ne’e hanesan oportunidade atu besik ba lideransa, diskute ita-nia parseria kontínua no hatene programa no inisiativa Kuba nian hirak ne’ebé bele tulun ita-nia dezenvolvimentu rasik. Governu hamutuk ho Primeiru-Ministru no ninia delegasaun atu hato’o ninia agradesimentu ba apoiu konsistente no firme husi ita-nia maun-alin no feton-naan sira husi Kuba iha luta tinan barak nia laran ba ita-nia libertasaun no, oras ne’e, iha luta ba ita-nia dezenvolvimentu sustentavel.”