Primeiru-Ministru halao vizita supreza ba IAE n Armazen Fos MCIA nian
Primeiru-Ministru,Rui Maria de Araújo, halao vizita supreza ba fatin Inspesaun Alimentar Ekonomia (IAE) no Armazen Fos MCIA nian, Sesta-feira ne’e (18/09).
Vizita Xefé do Governo ba iha fatin Inspesaun Alimentar Ekonomia (IAE) nian iha Matadouro, Dili, hodi hare lalaok servisu IAE nian no koalia direitamente ho funsionariu sira ne’ebé hala’o servisu Inspesaun.
Iha IAE, Primeiru-Ministru halao vizita ba sala de Inspectores de Metrologia e Estandarizasaun, akompaña husi Vise-Ministru Komérsiu, Indústria no Ambiente, Filipus Nino Pereira. Inspeitor IAE sira iha biban ida ne’e informa ba Primeiru-Ministru kona-ba oinsa Inspeitor sira halo inspensaun ba dasin liu husi halo kalibrasi ba dasin sira ne’ebe uja iha Merkadu no supermerkadu. Primeiru-Ministru mos halao vizita ba sala de Laboratoriu IAE nian hodi hatene liu tan
oinsa Inspeitor sira halo inspesaun ba supermerkadu sira hodi identifika sasan ninia kualidade no prazu, hodi kria kondisaun para oinsa proteje konsumidores sira nia direitu.
Husi Edifisiu Inspesaun Alimentar Ekonomia, Primeiru-Ministru akompaña husi Vise-Ministru Komérsiu, Indústria no Ambiente, Filipus Nino Pereira, halao vizita ba Armazen hare kulit no Batar, iha Bebora-Dili. Iha Armazen ida ne’e, Primeiru-Ministru hetan informasaun husi Administrador do Centro Logístico Nacional (CLN), Nivio Magalhães no Chefe Departementu CLN katak hare kulit ho toneladas 300 ital rai iha armazen ida ne’e desde tinan 2009 no to agora seidauk dulas tamba mákina dulas hare husi Kompañia lokal ne’ebe sira kontrata agora la funsiona.
Tan ne’e, Primeiru-Ministru husu ba Vise-Ministru Komérsiu, Indústria no Ambiente hamutuk ho Administrador do Centro Logístico Nacional (CLN) atu toma medidas hodi hare ba efisiensia no jestaun ba produtu hirak ne’e, hodi nune’e labele estragus. Vise-Ministru Komérsiu, Indústria no Ambiente hamutuk ho Administrador do Centro Logístico Nacional (CLN) sei koalia ho Ministeriu Agrikultura kona-ba asuntu refere iha tempu badak.
Husi Bebora, Primeiru-Ministru akompaña husi Vise-Ministru Komérsiu, Indústria no Ambiente no Administrador do Centro Logístico Nacional (CLN) ba hare mákina dulas hare iha Kuluhun hodi iha kuñesimentu ba servisu ne’ebe halao durante ne’e husi Centro Logístico Nacional no halao mos vizita ba Armazen Fos nian iha Tibar, Liquica.
