Governu Timor-Leste

Primeiru-Ministru,  Rui Maria de Araújo, no Ministru Negósius Estranjeirus no Kooperasaun, Hernani Coelho, hala’o sorumutuk privada sira ho Xefe Estadu no Xefe Governu nian balun, iha Asembleia Jerál Nasoins Unidas ninia rohan, iha Novaiorke.

Iha loron 28 fulan-setembru hala’o sorumutuk bilaterál sira ho Kabu Verde, Saun Tomé no Prínsipe no Suésia.

Primeiru-Ministru timoroan no ninia omólogu husi Kabu Verde, José Maria Neves, diskute kona-ba situasaun atuál nasaun rua ne’enian, atividade sira CPLP nian no mós área foun sira ba relasaun bilaterál. Iha sorumutuk ne’e nia rohan, Primeiru-Ministru halo entrevista badak ida ho Televizaun Nasionál Kabu Verde nian.

Tuirfali mai, Xefe Ezekutivu nian hala’o sorumutuk ho Primeiru-Ministru Saun Tomé no Prínsipe nian. Lider na’in rua ne’e foka liu kona-ba fahe ba malu informasaun kona-ba dezenvolvimentu ekonomia nasaun rua ne’e nian, ne’ebé haree haree liu ba dezenvolvimentu rekursu naturál nian sira.

Sorumutuk bilaterál datoluk iha loron ne’e maka ho Primeiru-Ministru Suésia nian, Stevan Löfven. Tantu Timor-Leste no mós Suésia sai  hotu membru husi Grupu Nivel Aas ba Implementasaun Objetivu Dezenvolvimentu Susutentavel (ODS), no debate ne’e ko’alia liu kona-ba forma di’ak liu atu  hetan apoiu ba ninia implementasaun no etapa hirak ne’ebé Timor-Leste prevé ona. Durante sorumutuk ne’e, Rui Maria de Araújo, konvida ofisialmente ninia omólogu husi Suésia ne’e atu vizita Timor-Leste.

Iha loron 29 fulan-setembru maka sorumutuk ho Prezidente Repúblika Portugál nian, Aníbal Cavaco Silva, ne’ebé aproveita hodi fó parabens ba tranzisaun Governu nian no lideransa nian ne’ebé la’o ho di’ak iha T imor-Leste.

Iha sorumutuk ne’e sira na’in rua ko’alia kona-ba kooperasaun intersetoriál entre nasaun rua ne’e, inklui apoiu ba setór justisa no edukasaun nian, no, liuliu, iha promosaun lian portugés nian.