Primeiru-Ministru, Rui Maria de Araújo, hala’o sorumutuk iha loron 24 fulan-setembru ho Sekretáriu-Jerál Nasoins Unidas nian, Ban Ki-moon, iha Nova Iorke, molok abertura Simeira ba adosaun Ajenda Dezenvolvimentu pós-2015.

 Iha sorumutuk badak ida, Sekretáriu-Jerál agradese papél Timor-Leste nian iha elaborasaun Ajenda ba Dezenvolvimentu Sustentavel 2030 nian foun no, liuliu, iha ninia knaar durante prosesu dezenvolvimentu objetivu 16: Pás, Justisa no Instituisaun Forte. Ban Ki-Moon fó mós parabens ba Timor-Leste ba susesu ne’ebé hetan ona dezde independénsia no dehan katak paíz barak maka konsidera nasaun ne’e hanesan ezemplu estabilidade no kreximentu ekonómiku nian. Sekretáriu Jerál ne’e mós espresa ninia apresu ba kontribuisaun husi José Ramos Horta ba serbisu ne’ebé nia hala’o iha Giné-Bisau no iha Painél Indepente Nivel Aas nian kona-ba Operasaun Pás Nasoins Unidas nian sira.

Primeiru-Ministru timoroan ne’e informa ba Sekretáriu-jerál katak Konsellu Ministrus Timor-Leste nian aprova ona Objetivu Dezenvolvimentu Susutentavel nian sira, hodi sai ona hanesan parte husi estrutura polítika nasaun ne’e nian no iha kompromisu sériu iha implementasaun Ajenda ne’e nian. Rui Maria de Araújo destaka mós kona-ba polítika hirak ne’ebé Governu introdús dadaun ba formasaun joven timoroan sira no iha kriasaun oporunidade serbisu nian, dezafiu ne’ebé hanesan ba nasaun barak husi g7+. Sorumutu ne’e serve atu agradese pesoalmente ba Ban Ki-Moon ba ninia kompromisu no apoiu iha prosesu konstrusaun pás no Estadu Timor-Leste nian hotu-hotu.

Sekretáriu-Jerál, Ban Ki-Moon, vizita ona Timor-Leste iha tinan 2007 no 2012.

Iha sesta dadeer, hafoin diskursu Papa Francisco nian, hahú kedas ho Simeira Nasoins Unidas nian atu aprova Ajenda Dezenvolvimentu pós-2015. Tuirmai, sei hala’o Debate Nivel Aas iha Asembleia-Jerál Nasoin Unidas nian, iha segunda, loron 28 fulan-setembru.