Primeiru-Ministru Dr. Rui Maria de Araújo, ohin (07/09) partisipa iha aprezentasaun kona- ba konseitu estratéjiku Defeza no Seguransa Nasionál nian ne’ebé halo husi Vise Xefe Estadu Maijór-Jenerál Forsa Armada, Brigadeiru-Jenerál Filomeno Paixão de Jesus, ho introdusaun badak hosi Ministru Defeza Cirilo Cristóvão, iha Ministério da Defeza no Kuartél-Jenerál F-FDTL nian iha Fatuhada-Dili.

Partisipa iha aprezentasaun ne’e, Ministru Estadu, Koordenadór Asuntu Sosiál no Ministru Edukasaun,  António da Conceição, Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál Dr. Dionísio Babo Soares, Ministru Justisa, Ivo Valente, Ministra Solidariedade Sosiál, Isabel Amaral Guterres, Ministru Petróleu no Rekursu Minerál, Alfredo Pires, Ministru Interiór, Longuinhos Monteiro, Vise-Ministru Finansas, Hélder Lopes, no Sekretáriu Estadu Juventude no Desportu,  Leovigildo Hornay, Komandante-Jerál Polísia Nasionál Timor-Leste (PNTL) Komissáriu Julio Hornay, no assesór militár no sivil governu nian sira ba área defeza no seguransa, no mós média.

Iha biban hanesan Primeiru-Ministru hatete katak maske konseitu estratéjiku Defeza no Seguransa Nasionál ne’e liuhusi prosesu ne’ebé naruk sei presiza konsidera mós aspetu balun husi sosiedade sivil nian tanba kestaun defeza no seguransa iha relasaun ho kestaun dezenvolvimentu nasionál.

“Em termus prosesu nian ha’u nia hanoin ita konsidera mós oportunidade ida atu loke diálogu ho parseiru no sosiedade sivil nian sira tanba ne’e la’ós dokumentu konfidensiál ida. Ida ne’e liña orientadór sira oinsá ita-atu halo ita-nia Polítika Defeza no Seguransa,” tenik Primeiru-Ministru.

Xefe Governu mós koa’lia liu kona-ba nesesidade atu konsidera iha konseitu estratéjiku laran asuntu sira ne’ebé iha relasaun ho Tasi Timor nian no atividade sira hotu ne’ebé hala’o iha tasi laran ne’ebé iha futuru sei inklui ba-iha Autoridade Marítima nia tutela.

“Iha kontestu ida ne’e ha’u hakarak atu apela, ita fó atensaun espesiál ida iha konseitu defeza no seguransa ne’ebé iha relasaun ho ita nia tasi, iha relasaun ho atividades hotu-hotu ne’ebé hala’o iha tasi, nune’e ita bele apresa ho ita nia Autoridade Marítima. Ita tenke harii ona hodi nune’e ita bele hala’o servisu di’ak liután iha área ida ne’e,” hatutan Primeiru-Ministru.

Xefe Governu loke dalan-tan atu bainhira konseitu estratéjiku Defeza no Seguransa Nasionál  avansa to’o nia rohan ona bele lori ba Konsellu Ministrus hodi hetan aprovasaun no formaliza hanesan Polítika ba Defeza no Seguransa Nasionál Timor-Leste nian.