Sorumutuk estraordináriu Konsellu Ministrus nian iha loron 25 fulan-agostu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 25 fulan-agostu tinan 2015
Komunikadu Imprensa
Sorumutuk estraordináriu Konsellu Ministrus nian loron 25 fulan-agostu 2015
Konsellu Ministrus hala’o sorumutu estraordináriu iha loron 25, fulan-agostu, tinan 2015, iha sala sorumutuk Konsellu Ministrus nian, iha Palásiu Governu, iha Dili, atu tau atensaun ba situasaun ida kona-ba kooperasaun bilaterál, relasiona ho vizita ofisiál ba Indonézia, ne’ebé Primeiru-Ministru hahú ohin.
Ministru Negosius Estranjeirus no Kooperasaun, Hernâni Coelho, halo aprezentasaun badak ida kona-ba interese komún ba paíz rua nian, hodi hateten katak Indonézia maka país ida ho populasaun barak liu iha Asosiasaun Nasaun Sudoeste Aziátiku (ASEAN), no hetan kuartu lugar iha mundu. Tuir relatóriu foin daudaun ne’e nian hosi Banku Mundiál, katak kona-ba ekonomia, Indonézia nian hetan désimu lugar iha mundu rai-klaran.
Relasaun sira entre Timor-Leste ho Indonézia di’ak tebes. Vizita hirak hosi altu nível nian iha tinan hirak liubá hatudu duni kompromisu polítiku ida forte no relasaun bilaterál ne’ebé di’ak tebes.
Kooperasaun ne’e hala’o kedas ohin iha área oin-oin, no país rua ne’e, fahe sira nia preokupasaun ba malu, iha nível rejionál no globál, hanesan protesaun ba diversidade mariña iha Triángulu Korál no aumenta diálogu entre país sira iha Sudoeste Pasífiku.
Ho objektivu atu hakle’an kestaun ida ne’e ho kestaun hirak seluk ne’ebé mak iha interese husi parte rua nian hotu, maka Primeiru-Ministru, Rui Maria de Araújo deside lori delegasaun ida kompostu hosi Ministru Estadu, Koordenadór Asuntu Sosiál no Ministru Edukasaun, António da Conceição, hosi Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva, hosi Ministru Negósius Estranjeirus no Kooperasaun, Hernâni Coelho, hosi Ministra Finansas, Santina Cardoso, hosi Ministru Obras Públikas, Transportes no Komunikasaun, Gastão de Sousa, hosi Ministru Defeza, Cirilo Cristóvão no hosi Ministru Planeamentu no Investimentu Estratéjiku, Xanana Gusmão.
Konsellu Ministrus analiza mós proposta atu hala’o “Kore-Metan Nasionál” – serimónia konjuntu ida ne’ebé sei hakotu ho tau metan iha nasaun Timor-Leste tomak hodi hanoin hikas herói hirak mate iha luta ba libertasaun nasionál – ne’ebé sei hahú iha fulan oin mai.
