Primeiru-Ministru lidera delegasaun nivel aas nian iha vizita ofisiál ba Indonézia
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 25 fulan-agostu tinan 2015
Primeiru-Ministru lidera delegasaun nivel aas nian iha vizita ofisiál ba Indonézia
Primeiru-Ministru, Rui Maria de Araújo, ohin halo viajen bá Jakarta, nu’udar vizita ofisiál ba Repúblika Indonézia. Ida ne’e hanesan vizita ofisiál internasionál dahuluk Primeiru-Ministru nian, hafoin simu tiha pose iha loron 16 fulan-fevereiru tinan ida ne’e. Iha vizita ida ne’e, sei akompaña husi delegasaun boot ida husi membru aas Governu nian, ne’ebé sei partisipa iha sorumutuk bilaterál sira importante, iha loron tolu mai ne’e.
Halo parte iha delegasaun ne’e Ministru Estadu, Koordenadór Asuntu Sosiál no Ministru Edukasaun António da Conceição, Ministru Estadu, Koordenadór Asuntu Ekonómiku no Ministru Agrikultura no Peska, Estanislau da Silva, Ministru Negósiu Estranjeiru no Kooperasaun, Hernani Coelho, Ministra Finansas, Santina Cardoso, Ministru Obras Públikas, Transporte no Komunikasaun, Gastão de Sousa, Ministru Defeza, Cirilo Cristovão, no Ministru Planeamentu no Investimentu Estratéjiku, Kay Rala Xanana Gusmão.
Primeiru-Ministru hatete konaba importánsia husi vizita ne’e: “Ita fó valór tebes ba ita-nia relasaun ho nasaun boot Indonézia.”
Iha vizita ne’e, Rui Maria de Araújo sei simu ofisialmente husi Prezidente Repúblika Indonézia nian, Joko Widodo, iha Palásiu Istana Merdeka. Iha kuarta-feira, sira na’in rua sei hasoru malu nu’udar privadu, molok delegasaun sira hosi nasaun rua ne’e hamutuk malu iha sorumutuk bilaterál, ne’ebé sei aprezenta deklarasaun konjunta ida ba imprensa. Tuir mai, Prezidente Widodo sei oferese almosu ofisiál ida ba Primeiru-Ministru no ninia komitiva.
Iha kinta-feira, Primeiru-Ministru sei hala’o sorumutuk ho Sekretáriu-Jerál ASEAN nian, Le Luong Minh, iha Sekretariadu organizasaun ne’e nian iha Jakarta.
Tuir ajenda nia sei fila hikas mai Díli iha sesta-feira, loron 28 fulan-agostu. To’o tiha iha Díli, sei hala’o konferénsia imprensa espesiál ida, iha Aeroportu Internasionál Nicolau Lobato.
Portavós VI Governu Konstitusionál nian, Ministru Estadu Agio Pereira, hateten katak “viajen ba Indonézia ne’e importante tebes ba país rua ne’e, tanba selebra solidariedade no kooperasaun ne’ebé hatudu ba ita nia relasaun úniku. Ita nia parseria sira habelar ona ba-iha setór hotu-hotu no vizita Primeiru-Ministru Rui Maria Araújo nian, ne’ebé akompaña hosi membru aas sira hosi ita nia Governu, sei hametin liután amizade ida pozitivu no produtivu ne’ebé mak iha tiha ona.
