………………………………………………………………………………………………………………
Díli, loron 19 fulan-agostu tinan 2015
Komunikadu Imprensa
Toleránsia pontu ba-iha loron 20 fulan-agostu 2015
Governu Konstitusionál VI Timor-Leste nian deside ona fó toleránsia pontu ba-iha loron 20 fulan-agostu 2015, ba funsionáriu no ajente sira hotu ministériu nian sira ka servisu hirak ne’ebé depende ba sira, nune’e mós institutu no organizmu hirak ne’ebé integra ba-iha administrasaun indireta Estadu nian.
Iha loron ida ne’e, komemora aniversáriu da-40 FALINTIL sira nian, ne’ebé reprezenta ona frente armada husi luta ba libertasuan nasionál no ninia istória selebra liuhusi programa ne’ebé ninia pontu aas liu hala’o iha loron 20 fulan-agostu.
Desizaun ida ne’e bazeia ba Lei n.u 10/2005, loron 10, fulan-agostu nian, ne’ebé determina loron sira feriadu nasionál, data ofisiál komemorasaun no fó toleránsia pontu nian sira.