Primeiru-Ministru, Rui Maria de Araújo, fila-fali ona mai Dili iha loron 8 fulan-agostu, hafoin vizita serbisu nian badak ida ba Hong Kong. Objetivu prinsipál husi vizita ne’e maka partisipa iha semináriu ida kona-ba investimentu, ne’ebé prepara husi Komité Akonsellamentu Investimentu (KAI) Timor-Leste nian. Sorumutuk ne’ebé hala’o entre loron 4 no loron 6 fulan-agostu nian ne’e, foka liuliu kona-ba investimentu sira husi Fundu Petrolíferu Timor-Leste nian.

Primeiru-Ministru marka prezensa, hamutuk ho Ministra Finansas, Santina Cardoso, delegasaun ida husi Ministériu Finansas, membru sira husi KAI no ekipa ida husi Banku Sentrál Timor-Leste nian.

Realizasaun sorumutuk ne’e nian iha Hong Kong fasilita peritu finanseiru nian sira no jestór fundu esternu nian  hirak ne’ebé sira-nia eskritóriu lokaliza iha rejiaun ne’e.

Informasaun sira ne’ebé mak aprezenta, fahe no diskute hamutuk iha semináriu ne’e sei ajuda akonsellamentu husi KAI ba Governu kona-ba estratéjia investimentu nian ne’ebé iha probabilidade konsideravel atu hetan di’ak liu retornu iha prazu longu, ne’ebé ajusta ho grau risku nian.

Primeiru-Ministru aproveita vizita ne’e hodi halo entrevista ba meiu komunikasaun boot sira iha área finanseira sira nian, liuliu Bloomberg no Wall Street Jounal.