Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 10 fulan-agostu tinan 2015

António da Conceição, Ministru Estadu, Koordenadór Asuntu Sosiál no Ministru Edukasaun

Prezidente Repúblika fó pose, ohin, ba António da Conceição, hanesan Ministru Estadu, Koordenadór Asuntu Sosiál no Ministru Edukasaun.

Kargu ne’e Fernando La Sama de Araújo maka prienxe, to’o nia mate ne’ebé derepente, iha loron 2 fulan-juñu liubá, mate ne’ebé povu timoroan tomak sente hanesan lakon boot ida, liuliu tanba nia hanesan eroi nasionál ida.

António da Conceição iha esperiénsia hanesan ministru, dezde tinan 2012, iha pasta Komérsiu, Indústria no Ambiente nian, iha Governu Konstitusionál V no VI.

Vise-Ministru Komérsiu, Industria no Ambiente, Constâncio da Conceição Pinto, maka okupa fali kargu hanesan Ministru no Filipus Nino Pereira simu nomeasaun hanesan hanesan nia Vise-Ministru.

Serimónia fó posse nian ne’e hala’o iha dadeer ne’e, iha serimónia ne’ebé hala’o iha Palásiu Prezidensiál husi Taur Matan Ruak. Iha semana kotuk, Prezidente fó hatene ona ninia aseitasaun ba proposta husi Primeiru-Ministru, Rui Maria de Araújo, ba nomeasaun hirak ne’e, ne’ebé mak sei prienxe fatin mamuk iha estrutura Governu nian ne’ebé Fernando La Sama de Araújo husik hela tanba mate ona.

Vise-Ministru Edukasaun nian na’in rua, Dulce Jesus Soares no Abel da Costa Ximenes, sei kaer nafatin knaar ne’ebé oras ne’e sira ezerse hela.