Primeiru-Ministru hala’o sorumutuk ho Vise-Ministru Edukasaun, Abel Ximenes, no Diretór sira husi Ministériu Edukasaun, no mós ofisiál sira husi unidade monitorizasaun husi gabinete Ministru Estadu, Koordenadór Asuntu Sosiál, iha Palásiu Governu, ho objetivu atu buka hatene no rezolve kestaun atrazu pagamentu ba profesór no traballadór sira husi Sentru Aprendizajen no Formasaun Eskolár (CAFE, sigla iha lian portugés) sanulu resin tolu iha Timor-Leste laran tomak.

Hosi Sorumutu ne’e, Primeiru-Ministru hetan informasaun detalladu katak finansiamentu ba CAFE hosi Ministru Edukasaun, hala’o liuhusi mekanizmu rua: ida maka Fundu Kontrapartida nian transfere ba konta embaixada Portugál nian hodi selu traballadór sira iha CAFE, no ida seluk maka pagamentu diretu ba profesór portugés sira nia konta bankária. Kauza husi atrazu ne’ebé mosu beibeik maka jestaun interna Ministériu nian ne’ebé ladún di’ak no orsamentu ne’ebé aloka iha tinan 2015 ba Sentru ne’e la sufisiente.

Nu’udar rezultadu husi sorumutuk ne’e, Primeiru-Ministru fó instrusaun ba Ministériu Edukasaun atubele: prosesa lalais pagamentu ne’ebé pendente hela; buka orsamentu iha Ministériu Edukasaun nia laran hodi kobre défise ne’ebé iha; no ba tina inklui mós iha planu ba tinan 2016 nian, orsamentu ba CAFE iha rubrika transferénsia públika sira hodi nune’e bele fasilita ezekusaun programa sentru ne’e nian.

Informasaun ikus husi Ministériu Finansas hateten katak fundu kontrapartida bele transfere ona ba konta ne’ebé iha, iha loron 27 fulan-jullu segunda-feira ne’e.