Sorumutuk Konsellu Ministrus nian iha loron 4 fulan-agostu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 4 fulan-agostu tinan 2015
Sorumutuk Konsellu Ministrus nian iha loron 4 fulan-agostu tinan 2015
Konsellu Ministrus hala’o sorumutuk iha loron 4 fulan-agostu tinan 2015, iha sala sorumutuk Konsellu Ministrus nian, iha Palásiu Governu, iha Dili, no aprova ona:
- Rezolusaun Governu nian ne’ebé aprova transferénsia kompeténsia sira kona-ba prestasaun servisu no orsamentu ba Autoridade Rejiaun Administrativa Espesiál Oekusi Ambenu
Konsellu Ministrus analiza ona rezultadu sira husi serbisu hirak ne’ebé Komisaun Koordenasaun no Akompañamentu Autoridade Administrativa Espesiál Oekusi Ambenu (RAEOA) halo – iha ne’ebé membru Governu nian sira no mós membru Autoridade Rejiaun Administrativa nian partisipa – kona-ba prosesu transferénsia funsaun no meiu umanu sira, materiál no finanseiru sira ba Rejiaun Espesiál ne’e.
Aleinde ne’e, Konsellu Ministrus ko’alia kle’an mós kona-ba relasionamentu entre RAEOA ho Governu, no entre servisu sira husi Administrasaun Públika Sentrál no Rejionál. Iha sekuénsia husi sorumutuk hirak ne’e nian no rona tiha Prezidente RAEOA no Autoridade nian, Konsellu Ministrus konsidera presiza halo aprovasaun ba Rezolusaun ida ne’ebé estabelese regra sira kona-ba ezekusaun administrativa no implementasaun husi lejizlasaun ne’ebé vigora ona oras ne’e.
- Dekretu-lei ne’ebé aprova orgánika Sekretaria Estadu Fortalesimentu Institusionál nian
Inisiativa lejizlativa ida ne’e aprova estrutrura Sekretaria Estadu Fortalesimentu Institusionál (SEFI) nian, hodi kumpre buat ne’ebé orgánika Governu Konstitusionál VI nian prevee ona kona-ba Departamentu ida ne’e.
Atu hala’o knaar hirak ne’ebé nia simu, SEFI sei konta ho servisu sentrál neen, ho natureza diresaun nasionál nian.
Ho Aprovasaun ba estrutura orgánika SEFI nian, Governu fó hakat pozitivu ida ba promosaun profisionalizmu, efisiénsia no kualidade husi servisu Administrasaun Públika nian sira.
