Timor-Leste saúda kompromisu Partidu Traballista australianu ne’ebé deklara interese kona-ba problema fronteira marítima nian sira karik eleitu
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 26 fulan-jullu tinan 2015
Timor-Leste saúda kompromisu Partidu Traballista australianu ne’ebé deklara interese kona-ba problema fronteira marítima nian sira karik eleitu
Governu Timor-Leste nian valoriza ninia relasaun ho Austrália no partidu polítiku hotu nasaun ne’e nian.
Nune’e, ho laran haksolok maka Governu hasoru promesa Partidu Traballista Austrália (PTA) nian atu ”tama ba-iha kompromisu estruturadu ida ho Timor-Leste hodi negosia akordu ida kona-ba fronteita marítima sira”, karik eleitu ba Governu.
Kompromisu ida ne’e, partidu ne’e asume iha mosaun ida ho pontu haat, ne’ebé negosia ho nivel aas liu husi partidu ne’e nian no hetan aprovasaun iha Konferénsia Nasionál PTA nian, iha Melbourne, iha semana ida ne’e nia rohan. Mosaun ne’e subliña intensaun husi Partidu Traballista Austrália nian hodi mantein relasaun ida ne’ebé besik no pozitiva ho Timor-Leste. Asume ninia knaar iha negosiasaun fronteira marítima nian sira, partidu ne’e afirma mós ninia adezaun ba regra sira husi sistema internasionál. No konfirma katak Governu ida ne’ebé PTA maka lori sei haree fila-fali rezerva sira ne’ebé Austrália hatudu to’o oras ne’e relasiona ho Konvensaun Nasoins Unidas nian kona-ba Diretu Tasi nian (CNUDM), ne’ebé dadaun ne’e limita rekursu Timor-Leste nian ba entidade seluk ida ne’ebé funsiona hanesan árbitru ba-iha rezolusaun delimitasaun froneteira nian sira.
Governu Timor-Leste kongratula ho afirmasaun ida husi partidu rua, husi Austrália, kona-ba valór husi relasionamentu bilaterál, nune’e mós ho deklarasaun partidu rua nian ne’ebé defende importánsia husi prinsípiu sira lei husi internasionál nian.
Portavós Governu Konstitusionál VI, Ministru Estadu Agio Pererira, salienta katak “Governu simu ho entuziazmu rezolusaun Partidu Traballista australianu nian. Rezolve kestaun fronteira marítima nian sira hanesan asuntu soberania nasionál nian ida. Ita kontinua tenta hetan akordu estruturadu ida ho Governu Austrália nian, hodibele hetan progresu iha kestaun ida ne’e, iha kontestu kona-ba ita nia-relasaun besik ho Austrália. REMATA
