Iha ámbitu Prezidénsia Rotativa Komunidade Nasaun Lingua Portugés nian sira (CPLP, sigla iha lian portugés), kargu ne’ebé Timor-Leste agora lori, maka ofisiálmente halo ona inaugurasaun ba sede Reprezentasaun organizasaun ne’e nian iha Dili. Seremónia ne’e hala’o iha loron 23 fulan-jullu ho prezensa husi titulár ka reprezentante sira husi Ministériu Negosiu Estranjeiru husi nasaun hamutuk sia ne’ebé sai hanesan membru CPLP nian.

Espasu foun ida ne’e, ne’ebé lokaliza iha Avenida de Portugal, Praia dos Coqueiros, sei sai hanesan sede CPLP nian iha tempu ne’ebé Timor-Leste kaer knaar Pezidénsia nian. Espasu ne’e sei funsiona mós hanesan pontu informasaun no divulgasaun nian kona-ba organizasaun ne’e iha komunidade nasionál no internasionál ne’ebé hela iha Timor-Leste ninia leet, mezmu liutiha tinan 2017, momentu ne’ebé Timor-Leste fó fali knaar Prezidénsia rotativa nian ba fali nasaun tuirmai.

Iha inaugurasaun ne’e, lansa mós Programa CPLP Audiovisuál, inisiativa ida kona-ba interkámbiu kulturál ne’ebé dedika ba produsaun no teledifuzaun konteúdu audiovizuál sira iha nasaun CPLP nian sira.

Dadaun ne’e, iha atividade tolu ne’ebé mak define tiha ona: “II Programa de Fomento à Produção e à Teledifusão do Documentário da Comunidade dos Países de Língua Portuguesa (DOCTV CPLP II)”, ho realizasaun vídeo sia – Estadu-Membru ida vídeo ida; “I Programa de Fomento ao Desenvolvimento, Produção e Teledifusão das Obras de Ficção da Comunidade dos Países de Língua Portuguesa (FICTV CPLP)”, ho telefilme haat no projetu dezenvolvimentu telefilme nian hamutuk lima; no realizasaun dokumentáriu haat, ho envolvimentu televizaun nasionál sira komunidade ne’e nian.

Konkursu nasionál DOCTV II no FICTV sei hahú lansa iha fulan-agostu tinan 2015. Programa CPLP Audiovisuál konta ho orsamentu hamutuk euro millaun tolu.