Sorumutuk Konsellu Ministrus nian iha loron 7 fulan-jullu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 7 fulan-jullu tinan 2015
Komunikadu Imprensa
Sorumutuk Konsellu Ministrus nian iha loron 7 fulan-jullu tinan 2015
Konsellu Ministrus hala’o sorumutuk iha tersa ne’e, loron 7 fulan-jullu tinan 2015, iha sala sorumutuk Konsellu Ministrus nian, iha Palásiu Governu, iha Dili no aprova ona:
1. Rezolusaun Governu nian kona-ba Loron Nasionál Funsaun Públika nian
Konsellu Ministrus deklara ona loron 15 fullan-jullu nu’udar Loron Nasionál Funsaun Públika nian.
Iha loron 15 fulan-jullu tinan 2009 maka publika lei importante rua ba Administrasaun: Lei nu 5/2009, ne’ebé altera Estatutu Funsaun Públika nian, no Lei nu 7/2009, ne’ebé harii Komisaun Funsaun Públika.
Data ne’e ninia objetivu maka fó omenajen no rekoñesimentu ba méritu husi sira hotu ne’ebé maka dedika an ona iha konstrusaun Estadu nian no Dezenvolvimentu instituisaun sira nian atu alkansa soisiedade ida ne’ebé justu liután no data ne’e tenke selebra iha nasaun laran tomak, maibé sei la iha toleránsia pontu ka feriadu nasionál iha loron ne’e.
2. Dekretu-Lei ne’ebé estabelese orgánika Ministériu Solidaridade Sosiál ninian
Tuir Orgánika Governu Konstitusionál VI, Ministériu Solidaridade Sosiál, “maka órgaun sentrál Governu nian ne’ebé sai hanesan responsavel atu halo konsepsaun, ezekusaun, koordenasaun no avaliasaun kona-ba polítika ne’ebé Konsellu Ministrus define no aprova ona, ba área sira seguransa sosiál, asisténsia sosiál, dezastre naturál no reinsersaun komunitária nian”.
Estrutura orgánika ne’e reformula ona, atu hadi’a efisiénsia husi serbisu sira husi administrasaun direta no indireta Ministériu Solidaridade Sosiál nian, hodi fó ba ministériu ne’e kompeténsia hirak ne’ebé presiza atu sai efisiente liután dezenvolvimentu polítika sira iha área hirak ne’ebé tutela ba nia. Polítika hirak ne’e hatuur iha Programa Governu Konstitusionál VI nian no iha Planu Atividade Ministériu Solidaridade Sosiál nian ba tinan 2013-2017.
Diploma ne’e elabora tuir esperiénsia serbisu Ministériu ne’e nian no nesesidade ne’ebé iha atu kontribui ba intervensaun sosiál integrada ida, hodi hatán ba dezafiu sira husi vizaun multidimensionál ida kona-ba kestaun hirak ne’ebé iha relasaun ho moris-kiak nian.
Konsellu Ministrus analiza mós:
- 1. Preparasaun Orsamentu Jerál Estadu nian ba tinan 2016
Konsellu Ministrus define marjen sira husi valór ne’ebé aas liu husi orsamentu ba tinan 2016. Valór finál sei konta ho projetu foun sira ne’ebé presiza ba ezekusaun Programa Governu nian. Distribuisaun valór ne’ebé aas liu husi despeza ne’ebé liga ba beins no servisu no ba saláriu no vensimentu, iha órgaun governamentál ida-idak tenke asegura katak labele iha redusaun ba montante hirak ne’e no reforsu orsamentu iha área prioritária sira hanesan saúde, edukasaun, agrikultura no infraestrutura bázika bee no saneamentu nian.
Aprezentasaun Ministériu Finansas halo iha sekuénsia husi enkontru no sorumutuk serbisu nian lubuk ida ne’ebé envolve setór oin-oin, hanesan Jornada Orsamentál, sorumutuk Konsellu Ministrus nian no interministerial sira, no husi serbisu hirak ne’ebé dezenvolvidu atu prepara proposta orsamentu nian ba tinan oinmai. Ida ne’e tenke hatán ba diretríz governamental sira ba elaborasaun Orsamentu Jerál Estadu sustentavel, iha ne’ebé laiha gastu hirak ne’ebé la presiza, maibé asegura prestasaun servisu ida ne’ebé efikás, efisiente no justa.
