Ministru Justisa Repúblika Demokrátika Timor-Leste, Ivo Valente prezide konferénsia Ministru Justisa nasaun sira ho lian ofisiál Portugés nian da-XIV durante loron rua iha Ministériu Negósius Estranjeirus no Kooperasaun (MNEK) iha Dili, iha loron 22-23 fulan-juñu tinan 2015.

Tema prinsipál husi konferénsia da-XIV “Propriedade ba rai nu’udar fatór dezenvolvimentu”, importante ba país sira CPLP nian ho lian ofisiál Portugés atu dezenvolve komunidade iha ámbitu país sira nian.

Durante konferénsia, hahú uluk ho aprezentasaun rezultadu husi servisu komisaun nian  ne’ebe hala’o uluk ona iha Maputu, ne’ebé ho ninia rezultadu hanesan: Kombate Tráfiku Umanu no Prevensaun no Kombate Korrupsaun ba-iha Tranzasaun Komersiál Internasionál nian sira.

Iha konferénsia ne’e, Ministru Justisa RDTL rona esperiénsia sira husi nasaun sira ho lian ofisiál Portugés liuhusi aprezentasaun nasaun ida-idak nian kona-ba sistema Kadastru Nasionál inklui Timór-Leste rasik mós halo ninia aprezentasaun husi Diretór Nasionál Terra, Propriedade no Servisu Kadastrais (DNTPSC -sigla iha lian portugés), Romão Guterres.

Ministru Justisa Repúblika Demokrátika Timór-Leste, Ivo Valente, hateten,” Timor-Leste foti tema Propriedade ba rai nu’udar fatór dezenvolvimentu tanba haree ba Timor-Leste nia esperiénsia, hahú husi restaurasaun independénsia iha tinan 2002. Ema barak mak iha interese atu mai investe liuliu investór internasionál sira, ne’ebé mak iha interese atu investe, maibé ema barak mós sei preokupa ho ita-nia lei rasik kona-ba rai ne’ebé seida’uk iha. Ne’e duni tema ida ne’e importante atu rona esperiénsia husi país CPLP nian sira seluk liuliu sira ne’ebé maka liu ona husi esperiénsia hanesan iha tempu kolonializasaun Portugés. Iha sira nia país mós sira hasoru  problema kona-ba rai.”

Ministru Justisa, Timor-Leste hatutan liután” Timor-Leste sei aprende barak no aprende hosi ita-nia nasaun irmaun sira ne’ebé mak iha mós esperénsia hanesan ita. Konserteza ita iha istória diferente oituan ho sira nian, entaun ita aprende atu halo komparasaun hodi haree oinsá halo di’ak liután kona-ba ita nia esbosu ba lei sira ne’ebé mak sei mai iha futuru.”

Konferénsia Ministru Justisa ho Lian Ofisiál Portugés CPLP ne’e forum deside Ministru Justisa RDTL, Ivo Valente sai nu’udar Prezidente no Diretór Nasionál Asesoria Juridíka no Lejislasaun (DNAJL) iha Sekretariadu Jerál durante tinan rua (hosi 2015 – 2017).

Iha konferénsia ne’ebé loke husi Primeiru Ministru, Rui Maria de Araújo ne’e asiste mós husi Membru Governu Timor-Leste balun.