Primeiru-Ministru Dr. Rui Maria de Araújo loron 26 fulan-juñu tinan 2015, halo abertura ba Workshop kona-ba Planu Anuál ba Tinan 2016 VI Governu Konstitusionál nian, iha Salaun Nobre, Ministériu Negósius Estranjeirus no Kooperasaun, iha Dili.

Workshop ne’e hodi aprezenta ba partisipante sira instrumentu oin-oin atu garante katak dezeñu no implementasaun planu Governu nian halo ligasaun ho orsamentu ne’ebé aloka ba atividade sira liu hosi envelope fiskál idaidak nian no oinsá bele relata tuir indikadór sira ne’ebé identifika tiha ona iha planu asaun.

“Tinan-tinan ita halo Planu Anuál Aksaun maibé planu sira ne’e dala barak laiha relasaun ho prosesu orsamentu ne’ebé ita hala’o,” hatete Primeiru-Ministru.

Planu Anuál Governu Konstitusionál IV nian ba tinan 2016 no 2017 nia prioridade mak atu reforsa área haat importante: Agrikultura, Edukasaun, Saúde no Infraestruktura Bázika inklui mós Água no Saneamentu.

Primeiru-Ministru ko’alia liu katak, nesesidade atu dezenvolve Planu Anuál sira iha Governu tenke iha relasaun no iha ligasaun efetivu ho Orsamentu Jerál Estadu nian ne’ebé tinan-tinan Parlamentu Nasionál aprova.

“Ita bo’ot sira hotu hatene iha ámbitu jestaun nian ladun efetivu kona-ba instrumentu ba jestór sira atu haree atividade sira ne’ebé ita halo la’o tuir duni planu ka lae? Orsamentu ne’ebé ita gasta iha ligasaun ho planu ne’ebé ita halo ka lae?” Primeiru-Ministru husu ba partisipante sira. “Durante ida ne’e planu ne’ebé ita halo ne’e ho baze ba ita-nia nesesiedade no se ita-boot sira haree iha kontradisaun ruma durante ne’e? Planu Asaun Anuál halo ba ita-nia nesesiedade maibé orsamentu ne’ebé ita planeia tenke ho baze ba rekursu ne’ebé ita hetan.”

Primeiru-Ministru nia observasun finál ba partisipante sira mak prosesu planeamentu tenke iha lójika no tenke iha relasaun ho envelope fiskál halo ligasaun fali ba planu aksaun ne’ebé iha. “Ita tenke halo planu ho baze ba reskursu ne’ebé ita iha tanba ne’e maka distribuisaun envelope fiskál ne’e importante para bele orienta ba ita-nia planu sira,” haktuir tan Primeiru-Ministru.

Inisiativa workshop ne’e hosi Unidade Planeamentu, Monitorizasaun no Avaliasaun (UPMA) iha Gabinete Primeiru-Ministru hamutuk ho Ministériu Finansas.

Partisipa iha workshop ne’e maka Ministru sira, Sekretariu Estadu sira, Diretór Jerál no Diretór Nasionál sira, Xefe Departamentu sira no asesór sira ho responsabilidade ba iha área jestaun finansas públika nian.