Primeiru-Ministru Dr. Rui Maria de Araújo partisipa nu’udar oradór durante Semináriu Akadémiku ho tema ‘Vocação e Missão’ ohin sesta-feira (26/06), hodi komemora ‘Dies Natalis’ ba dala-150 Semináriu São Pedro no São Paulo nian iha Fatumeta, Dili.

Primeiru-Ministru agradese ba konvite ne’e no simu atu sai oradór iha okaziaun ida ne’e hodi aprezenta prespetiva Leigu sira nian.

“Iha kontestu atuál Timor nian, misaun ne’ebé importante ba saserdote sira-nian mak evanjeliza  batizadu sira,” hateten Primeiru-Ministru.

Husi perspetiva leigu sira-nian, Primeiru-Ministru ko’alia liu kona-ba uzu liafuan ‘Na’i Lulik’ atu deskreve saserdote sira tanba liafuan ‘Na’i Lulik’ inkorpora komponente rua mak ‘Lulik’ ho ‘Nai. “Wainhira Misionáriu sira to’o iha Timor, liafuan ne’ebé Timor-oan hateten kona-ba sira-nia traje, sira-nia atitude, sira-nia aparénsia, liafuan ‘Na’i Lulik’ mosu kedas iha ne’ebá,” tenik Primeiru-Ministru.

Iha parte seluk, husi perspetiva klase sosiál, liafuan ‘Na’i’ hatuur ba ema iha ierarkia ida ne’ebé aas liu no normalmente atribui ba ema ne’ebé la’ós baibain. “Saserdote sira ka padre sira iha kontestu mundu katóliku Timor nian ne’e, ita laiha dúvida katak sira la’ós ema bai-bain. Tan ne’e liafun ‘Na’i’ haree husi lian Tetun ninian kona loos,” hateten tan Primeiru-Ministru Dr. Araújo.

Xefe Governu salienta mós katak, iha nasaun hanesan Timor ne’ebé populasaun barak sei depende maka’as ba Na’i Lulik no Pároku sira atu dinamiza atividade sira.

“Wainhira Na’i Lulik sira la book an, leigu sira mós la book an. Ne’e hatudu dependénsia ida ne’ebé hatudu espetativa ba perfil ne’ebé saserdote ida presiza atu iha wainhira hala’o servisu iha komunidade,”  hatete Primeiru-Ministru. “Kompeténsia ne’ebé Na’i Lulik sira presiza iha atu liga asuntu hirak ne’e la’ós de’it iha nível operasionál maibé oinsá sai dinamizadór, mobilizadór no fasilitadór, mak importante tebes iha ita-nia sosiedade agora.”

Iha lia menon ikus Primeiru-Ministru hatete katak, perfil importante ida tuir leigu nia prespetiva mak Na’i Lulik ka Saserdote ida tenke sai ezemplu di’ak tanba dala barak buat ne’ebé ita koa’lia ladun iha influénsia iha sarani nia atitude, maibé ita-nia hahalok iha influénsia boot liu no tanba ne’e mak asaun pastorál vivénsia iha moris loroloron liuhusi ezemplu importante tebes.