Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 30 fulan-juñu tinan 2015

Personalidade sira realsa importánsia Fronteira Marítima sira ba Timor-Leste iha sorumutuk dahuluk Komisaun Konsultiva nian

Sorumutuk inaugurál Komisaun Konsultiva Konsellu ba Delimitasaun Definitiva Fronteira  Marítima sira Timor-Leste nian, ne’ebé hala’o ona horseik, iha Ministériu Negósiu Estranjeiru no Kooperasaun.

Hasoru malu iha sorumutuk ne’e, Prezidente Komisaun nian, Primeiru-Ministru Rui Maria de Araújo, eis  Prezidente José Ramos-Horta, eis-Primeiru-Ministru no atuál Ministru Planeamentu no Investimentu Estratéjiku, Kay Rala Xanana Gusmão, eis-Primeiru-Ministru, no atuál Ministru Estadu, Koordenadór Asuntu Ekonómiku no Ministru Agrikultura no Peskas, Estanislau da Silva, eis-Prezidente Parlamentu Nasionál, Francisco Guterres Lú-Olo, Ministru Estadu no Prezisdénsia Konsellu Ministrus, Ágio Pereira, Ministru Estadu, Koordenadór Asuntu Administrasaun Estadu no Justisa no Ministru Administrasaun Estatál, Dionísio Babo Soares, Ministra Finansas Santina Cardoso,Vise-Ministru Negósius Estranjeirus no Kooperasaun, Roberto Soares (ne’ebé reprezenta Ministru Hernâni Coelho) no Diretora Ezekutivu Gabinete Fronteira Marítima nian Elizabeth Exposto. Eis-Primeiru-Ministru, Marí Alkatiri, Ministru Petróleu Rekursus Minerais, Alfredo Pires no Ministru Negósius Estranjeirus no Kooperasaun, Hernâni Coelho, labele marka prezensa iha sorumutuk altu nivel ida ne’e.

Primeiru-Ministru hato’o boasvindas ba komisáriu partisipante sira no esplika kna’ar Komisaun Konsultiva nian, ne’ebé estabelese tuir lei, nu’udar órgaun konsultivu supremu Xefe Governu nian, hodi fó sai rekomendasaun ba-iha problema sira kona-ba delimitasaun fronteira marítima sira.Tanba ne’e, hanesan organizmu Governu nian ida, ne’ebé mak hato’o diretamente  ba Primeiru-Ministru.

Komisaun Konsultiva, Gabinete Fronteira Marítima sira no Ekipa Negosiasaun nian hanesan entidade tolu maka harii liuhosi Dekretu-Lei ne’ebé sai nu’udar Konsellu ba Delimitasaun Definitiva Fronteira Marítima sira, ne’ebé aprova iha fulan-abríl tinan ida ne’e nian.

Komisáriu sira fahe pontu de vista kona-ba dezenvolvimentu ikus ne’e  nian ho Ministru Estadu Ágio Pereira kona-ba problema fronteira marítima nian.

Diretora Gabinete Fronteira Marítima sira halo aprezentasaun kona-ba informasaun téknika nian. Daudaun ne’e, Gabinete ne’e iha Sentru Formasaun Diplomátika Ministériu Negósius Estarnjeirus no Koperasaun, maka responsável ba jestaun ezekutivu Konsellu nian no koordena servisu hotu hodibele asegura delimitasaun definitiva fronteira marítima nian.

Ministru Estadu no Portavós Governu Konstitusionál VI, Agio Pereira, konklui katak “sorumutuk dahuluk komisaun ne’e nian, hamutuk ho na’i ulun importante sira nasaun nian no ne’ebé maka respeitu liu, ita hotu hanoin hamutuk kona-ba kestaun fronteira marítima, ho espíritu ida determinasaun, dilijénsia, no dignidade nian. Hahalok ne’e hatudu loloos importánsia delimitasaun marítima ba Timor-Leste no ninia prioridade sira hanesan kestaun soberania nasionál nian ida”.