Primeiru-Ministru Dr. Rui Maria de Araújo ho Espoza Teresa Soares no mós Prezidente Repúblika Taur Matan Ruak ho espoza Primeira Dama Sra. Isabel Ferreira, ohin (16/04) lidera marxa atu komemora Loron Internasionál Família nian iha loron 15 fulan-maiu tinan-tinan. Loron Internasionál Família nian hanesan loron ida ne’ebé mundu dedika ba familia sira hotu, no iha Timor-Leste inisitativa ida ne’e mai husi Primeira Dama Isabel Ferreira no selebra iha Timor-Leste ba dahuluk. Marxa ba família ne’e hahú hosi Palásiu Prezidensiál to’o ba iha Largu Lesidere, Dili.

Primeiru-Ministru iha nia diskursu ko’alia kona-ba kontestu família nian katak, laiha métodu ida ne’ebé efisiente atu hanorin oan sira kona-ba Igualdade Jéneru bainhira la sai ezemplu ba ita nia oan sira. “Ita bele ko’alia teoria to’o ne’ebé, maibé lisaun ne’ebé ita nia oan sira aprende di’ak liu mak husi ita nia ezemplu rasik,” hateten Primeiru-Ministru Dr. Rui Araújo.

Ba selebrasaun Loron Internasionál Família nian, Primeiru-Ministru hato’o votus atu familia ida-idak iha Timor-Leste nia laran selebra hodi hala’o moris familia nian iha domin no fidelidade nia laran laós de’it iha loron 15 fulan-maiu, maibé hahú kedas husi loron 1 fulan-janeiru to’o loron 30 fulan-dezembru tinan tinan.

Mensajen hosi Primeiru-Ministru liu-liu ba Aman sira iha família idak-idak nia laran atu hatudu ezemplu iha distribuisaun sevisu iha uma laran, entre feen no la’en, no mós entre oan sira. “Uma kain rasik, família rasik tenke moris iha igualdade, se ita hakarak dezigualdade atu lakon iha sosiedade nia laran.  Iha aspetu igualdade direitu labarik nian signifika mane nu’udar aman iha familia, bele halakon toman aat uluk nian, ne’ebé, liu-liu sei nafatin mosu iha foho,  iha área rurál sira, wainhira laiha posibilidade atu haruka oan sira hotu ba eskola, prefere husik hela oan-feto sira iha uma, no haruka oan-mane sira maka ba eskola, ka prefere oan-feto sira lalika eskola boot, tanba husik atu hola mane sedu de’it,” haktuir Primeiru-Ministru.

Tan ne’e Primeiru-Ministru husu atu tempu to’o duni ona atu iha família nia laran, mane sira muda rumu ka diresaun dezigualdade jéneru no dezigualdade iha direitu ba labarik sira  iha família nia laran, hodi nune’e bele hakat lalais liután ba moris di’ak iha Timor-Leste.

Xefe-Governu hatutan tan katak VI Governu sei nafatin fó apoiu atu tinan-tinan loron ne’e selebra no mós fó instrusaun liuhosi Ministériu Administrasaun Estatál atu husu ba Administrasaun Munisípiu sira hotu-hotu atu halo mo’os Marxa Família nian durante oras ida ka oras rua nia laran iha Munisípiu ida-idak, iha loro 15 fulan-maiu. Hafoin Marxa partisipante sira hotu hamutuk halo limpeza iha sira nia Munisípiu rasik.