Primeiru-Ministru Dr. Rui Maria de Araújo ohin (11/05) vizita Sentru Nasionál Reabilitasaun (CNR-sigla iha lian portugés) iha Bekora, Dili, atu hatene di’ak liután servisu ne’ebé instituisaun públika ne’e halo ba Timoroan sira ne’ebé moris ho defisiénsia.

Akompaña Primeiru-Ministru mak Ministru Planeamentu no Investimentu Estratéjiku Sr. Kay Rala Xanana Gusmão no Ministra Solidariedade Sosiál Sra. Isabel Guterres.

CNR nia misaun mak atu ‘Hadi’a Kualidade Moris ba Ema ho Defisiénsia atu hetan Reabilitasaun ne’ebé Justu, Espesializadu no Integradu’.

Primeiru-Ministru apresia ba servisu ne’ebé CNR presta ona hodi tulun ema ho defisiénsia sira iha Timor-Leste.

“Sira halo servisu ida di’ak teb-tebes no Ita nu’udar sidadaun espesifikamete Ami sira ne’ebé responsável ba atividade Governu-nian presija fó nafatin apoiu ba servisu di’ak ne’ebé sira halo hodi nune’e Timoroan sira ne’ebé iha defisiénsia bele mós hetan atensaun ne’ebé sira merese.”

Iha vizita ne’e Xefi Governu haree besik liu kondisaun no mós atividade atendimentu ba pasiente sira ho desifiénsia liu-liu iha área hanesan Ortoprotezia, Fizioterapia, Terapia Okupasionál, Terapia Ko’alia, Kadeiras  Roda no Reabilitasaun Bázika.

“Servisu atendimentu ne’ebé di’ak ba ema ho difisiente bele fó mós benefísiu ba Dezenvolvimentu Timor-Leste nian.”

Primeiru-Ministru aproveita mós oportunidade iha vizita ne’e hodi dada-lia ho pasiente sira no fó motivasaun no korajen ba sira atu bele ultrapasa situasaun difísil ne’ebé sira hasoru.

Sentru Nasionál Reabilitasaun-CNR mak eis ONG ASSERT (Asosiasaun Hi’it Ema Ra’es Timor).

Primeiru-Ministru hateten katak VI Govenu Konstitusionál sei kontinua tulun CNR nia servisu atuál no mós servisu sira ne’ebé sei halo iha futuru atu nune’e sentru ne’e bele sai boot liu tan no bele habelar ninia servisu hodi fó atendimentu ba ema ho defisiénsia iha rai laran.