Primeiru-Ministru Dr. Rui Maria de Araújo hasoru ho ekipa Médiku Kardiolojista  sira husi IHEAL Medical Centre Kualalumpur, nasaun Malásia, iha Kuarta-Feira (06/05), iha Palásiu Governu, Dili.

Iha sorumutu ne’e ekipa espesialista sira ne’e akompaña hosi Ministra Saúde Dra. Maria do Céu,  no Vice-Ministra Saúde Dra. Ana Isabel Soares no mós Embaixadór Timor-Leste ba Malásia Sr. José António Amorim Dias.

Ekipa Médiku Kardiolojista Malazianu sira ne’ebé xefia husi Dr. David Khoo Sin Keat, partilla ho S.E. Primeiru-Ministru no Ministra no Vise-Ministra Saúde situasaun jerál saúde nian iha Malázia liu-liu kona-ba área espesializada kardiolojia nian.

Ministra Saúde Dra. Maria do Céu informa mós ba Priemeiru-Ministru kona-ba Memorandu Entendimentu  (MoU) ne’ebé Ministeriu Saúde asina tiha ona ho Sentru Médiku iHeal ne’ebe foka liu ba área espesífiku tolu: Referal ba Pasiente sira; Kapasitasaun Rekursu Umanu nian no intensaun investimentu atu Harii Sentru Kardiolojia iha Timor-Leste.

Primeiru-Ministru Dr. Rui Araújo apresia aprezentasaun hosi Ekipa iHeal no husu ba Ministra no Vice-Ministra  Saúde atu kontinua ho servisu hirak ne’ebé planeadu ona tuir MoU ne’ebé mak asina tiha ona.

Primeiru-Ministru haktuir tan katak atu fó formasaun ba futuru ba área-kardiolojia nian tenki fó prioridade ba doutór ka enfermeiru Timoroan sira ne’ebé foin sa’e no sira n’ebé iha duni dedikasaun atu estuda no hakarak kontribui ba dezenvolve setór saúde nian iha Timor-Leste.

Ekipa iHeal hato’o katak iha intensaun atu fó formasaun avansada ba Timoroan sira iha área kardiolojia nian atu nune’e tuir planu ba futuru nune’iha tinan 5 ka 10 nia laran Timor-Leste bele iha ona Sentru Kardiolojia  no Doutór Espesialista Kardiolojista sira ne’ebé kualifikadu no akreditadu bele fó atendimentu saúde espesializadu ne’e ba Povu Timor.

Desde MoU asina entre MS ho iHeal, pasiente na’in 42 resin maka refere ona ba sentru médiku ne’e hodi hala’o tratamentu no pasiente na’in 41 maka kura duni no fila ona mai Timor-Leste, enkuantu pasiente na’in ida maka la konsegue salva tanba sofre komplikasaun seluk. Iha área rekursu umanu nian, iha tempu badak Ministeriu Saúde sei haruka tan Enfermeiru na’in 4, Doutór Jerál na’in 2 no Doutór Espesialista na’in 2 hodi ba tuir kursu iha Malázia.