Autoridade Portuáriu Timor-Leste (APORTIL) entrega ona kareta 25 ba Governu, iha kinta-feira,  4 juñu 2015 iha Portu Dili. Durante tinan hirak nia laran, Governu prende kareta sira-ne’e tanba na’in sira hasees an husi responsabilidade legál.

Iha serimónia ne’e, ba-dala uluk simbolikamente APORTIL entrega ba Alfándega no tuir mai Alfándega entrega fali ba Ministériu Finansas, atu rai kareta sira-ne’e iha armazén Estadu nian, hanesan Patrimóniu Estadu.

Diretór APORTIL, Lino Barreto, esplika katak, kareta sira ho marka oioin, okupa fatin luan iha área Portu Díli nian, ne’ebé lori impaktu ba limitasuan movimentu kareta no servisu tékniku lorloron iha área ne’ebá.

Importasaun kareta sira-ne’e mai Timor-Leste, balun la prienxe kritéria tuir lei Timor-Leste nian, hanesan tinan produsaun liu tiha ona tinan lima.

Entertantu Diretór Jerál Alfándega, José António Fátima Abílio, informa katak, iha fulan hirak liubá Ministériu Finansa propoin ba Konsellu Ministru atu foti desizaun ba kareta sira-ne’ebé abandonadu iha Portu Dili.

“Ita espera sasan sira-ne’e sei asegura iha Estadu nia armazén, hanesan patrimóniu ba  estadu no sei hein prosesu tuir mai kona-ba utulizasaun kareta sira-ne’e,” José António esplika. Diretór José mós informa katak, iha tempu tuir mai, sei loke tan kontentór sasan sira nian, ne’ebé prende hela iha Portu Dili, nakonu ho sasan kareta, materiál eletrisidade, eletrónika, mobiliáriu no seluk tan.

Partisipa iha serimónia ne’e,  Diretora Nasionál  Patrimóniu Estadu nian, Evangelina Guterres, funsionáriu sira no konvidadu sira seluk.