Sorumutuk Konsellu Ministrus nian iha loron 23 fulan-juñu tinan 2015
Prezidénsia Konsellu Ministrus
VI Governu Konstitusionál
..............................................................................................................................
Díli, loron 23 fulan-juñu tinan 2015
Komunikadu Imprensa
Sorumutuk Konsellu Ministrus nian iha loron 23 fulan-juñu tinan 2015
Konsellu Ministrus hala’o sorumutuk tersa-feira ne’e, iha loron 23 fulan-juñu tinan 2015, iha sala sorumutuk Konsellu Ministrus nian, iha Palásiu Governu, iha Dili no aprova ona:
1. Dekretu-Lei ne’ebé estabelese orgánika Ministériu Interiór nian
Dekretu-Lei ne’e define orgánika, desentralizasaun atribuisaun sira Ministériu Interiór no reorganizasaun servisu sentrál sira ne’ebé maka iha diresaun, tutela ka superintendénsia hosi Sekretáriu Estadu Seguransa nian no Governu Konstitusionál V. Baze ideia diploma ne’e nian maka hametin estrutura Seguransa Nasionál Interna no Protesaun Sivíl.
Prevee, hanesan inovasaun sira, hodi harii Diresaun Nasionál Seguransa Rodoviária no Autoridade Nasionál Protesaun Sivíl nian.
Orgánika Ministériu Interiór reflete estrutura rasionál ida ne’ebé efikáz, efisiente, sólida no estável, nune’e mós iha ambisioza (iha ideia ne’ebé aas), liuliu iha rekursus umanus profisionál no iha kualifikasaun. Buka hodi hatán ba nesesidade reál sira ba aplikasaun no reforsu kona-ba polítika sira Seguransa Interna no Protesaun Sivíl nian, nu’udar área sira ne’ebé importante ba Seguransa Nasionál Timor-Leste nian.
2. Dekretu-Lei ne’ebé estabelese orgánika Ministériu Turizmu, Arte no Kultura nian
Tuir akordu Orgánika Governu Konstitusionál VI, Ministériu Turizmu hanesan órgaun sentrál Governu nian ne’ebé maka responsável ba konsesaun, ezekusaun, koordenasaun no avaliasaun kona-ba polítika área sira turizmu, arte no kultura nian, ne’ebé define no aprova ona hosi Konsellu Ministrus.
Importante maka, nafatin sei laiha alterasaun, ba atribuisaun no kompeténsia sira ne’ebé hala’o ho efisiénsia no efikásia ba ezijénsia hirak ne’ebé hato’o ona, la’ós de’it ba polítika Ministériu nian, maibé mós ba pretensaun ba sira ne’ebé maka hakarak investe iha área turizmu, iha Timor-Leste.
3. Dekretu-Lei ne’ebé estabelese orgánika Ministériu Planeamentu no Investimentu Estratéjiku nian
Tuir Orgánika Governu konstitusionál VI nian, Ministériu Planeamentu no Investimentu Estratéjiku hanesan órgaun sentrál Governu nian ne’ebé maka responsavél ba konsesaun, koordenasaun no avaliasaun politíka ba área sira promosaun nian dezenvolvimentu ekonómiku sosiál nasaun nian, ne’ebé define no aprova ona hosi Konsellu Ministrus. Ninia asaun hatudu liu-hosi planeamentu estratéjiku no integradu nian no rasionalizasaun kona-ba rekursu finanseiru ne’ebé mak iha, hodi simu mós responsabilidade partikulár sira ba-iha realizasaun Planu Estratéjiku Dezenvolvimentu nian.
Dekretu-Lei ne’e estabelese estrutura orgánika ba Ministériu foun ne’e, hodi promove efisiénsia kona-ba órgaun no servisu sira administrasaun direta nian no kona-ba organizmu sira administrasaun indereta Ministériu Planeamentu no Investimentu Estratéjiku nian. Fó ba sira kompeténsia hirak ne’ebé presiza ba dezenvolvimentu polítka iha área ne’ebé mak iha nia tutela ba-iha Programa Governu Konstitusionál VI no Planu Atividade Ministériu nian.
4. Proposta ba akordu entre Santa Sé no Repúblika Demokrátika Timor-Leste
Konsellu Ministrus foin lalais ne’e analiza ona proposta akordu nian entre Santa Sé no Repúblika Demokrátika Timor-Leste, iha negosiasaun entre Estadu rua husi kedas tinan 2009, kona-ba Konkordata. Konkluzaun sira ne’ebé hetan hosi sorumutuk ida ne’e sei hato’o ba Santa Sé, liuhosi Ministériu Negósiu Estranjeiru no Kooperasaun.
Konsellu Ministru mós daudaun ne’e trata ona asuntu hirak hanesan tuir mai ne’e:
1. Aprezentasaun Tetu Fiskál ba tinan 2016
Ministériu Finansas aprezenta ona ba Konsellu Ministru senáriu oin-oin ne’ebé mak haree liubá sustentabilidade ezekusaun orsamentál nian, hodi hola atensaun mós ba projetu sira ne’ebé maka sei hala’o hela, projetu foun no posibilidade kontinjénsia nian sira. Senáriu hirak ne’ebé mak estuda tiha ona hodi prepara ba tinan oin ho objetivu atu orienta ministériu sira ba elaborasaun planu anuál no ba nia orsamentu.
Aprezentasaun ida ne’e mai husi jornada orsamentál nian, semináriu ida ne’ebé mak hala’o iha fulan-maiu, ho membru Parlamentu Nasionál sira no Governu, Diretór-Jerál sira, Diretór Nasionál sira, kuadru superiór sira seluk Estadu nian no mós funsionáriu empreza públika sira no ajénsia autónoma sira, ne’ebé mak simu ona knaar hodi prepara Orsamentu Estadu nian ba tinan 2016.
Iha elaborasaun orsamentu ba tinan oin nian, sei hola atensaun iha fator oin-oin, liuliu kona-ba Planu Estratéjiku Dezenvolvimentu (PED), Programa Governu nian, ezekusaun orsamentál, inflasaun no sustentabilidade fiskál.
2. Komemorasaun tinan 40.u FALINTIL nian
Kumpri despaxu Primeiru-Ministru nian katak loron 3 fulan-juñu, ne’ebé mak estabelese komisaun organizadora kona-ba selebrasaun loron Forsa Defeza Timor-Leste nian (F-FDTL), Konsellu Ministrus analiza no diskute ona orsamentu ne’ebé mak sei fó hodi hala’o komemorasaun tinan 40.u FALINTIL nian, iha loron 20 fulan-agustu mai ne’e. Halo ona mós análize no defini ona servisu sira entre komisaun organizadora no ministériu sira ne’ebé maka relevante hodi organiza eventu ne’e.
