Ministériu Saúde kontinua hametin kontrolu ba servisu adminitrasaun públiku atu preveni má administrasuan, liuhusi asina akordu ho Provedoria Direitu Umanu no Justisa (PDHJ) no Inspensaun Jerál Estadu nian (IJE).

Akordu ne’e ho durasaun tinan ida to’o tinan rua, kobre Munisípiu 11 no Rejiaun Espesiál Administrasaun Oekusi-Ambenu (REOA). Akordu ne’ebé hala’o iha Dili, iha loron  13 fulan-maiu 2015, ho objetivu atu haree meius atubele preveni má administrasaun, promove boa governasaun no hakbi’it sistema kontrolu instituisaun  públiku.

Ministra Saúde, Maria do Céu Sarmento Pina da Costa, hateten, atividade ne’e importante ba dirijentes sira, liuliu responsavél kargu xefia iha administrasaun no responsavél programa iha Nasionál to’o Munisípiu.

Ministériu Saúde, PDHJ no IJE sei prepara matéria ba diseminasaun informasaun kona-ba boa governasaun, prevensaun ba korupsaun no oinsá halo atendimentu di’ak ba komunidade, “ ne’e bele minimiza keixa sira, “ nia esplika.

Provedór PDHJ Silvério Fátima Pinto, hateten, PDHJ no IJE koopera ho  Ministériu Saúde tanba instituisaun Governu ne’e nia pesoál tun to’o ba baze ho rekursu boot, hafoin Ministériu Edukasaun.

Nune’e, PDHJ ho IJE bele hatene saída mak prinsípiu Boa Governasaun. Ho hanoin katak sira ne’ebé ezerse funsaun Diretór Nasionál, Diretór Jerál, Xefe Departementu ka kaer kargu Munisípiu sira, tenki hala’o knar ho di’ak, Silvério dehan tan.

PDHJ nian knaar ba prevensaun fahe iha parte rua: fasilita treinamentu no monitorizasaun.

“Ha’u espera katak hafoin asina akordu ne’e, ita tau hamutuk rekursu hotu, hanesan pesoál no finanseiru atu deskuti oinsá ninia implementasaun? Ha’u mós husu ba ita-boot sira ne’ebé profesionál, atu servisu ho di’ak. Labele monu ba buat ne’ebé estraga ita-nia futuru,” Silvério reafirma tan.