Primeiru-Ministru Dr. Rui Maria de Araújo ohin (25/04) hasoru malu ho Jogadór no Atleta sira modelidade hitu Timoroan ne’ebé sei partisipa iha Sea Games 2015 ba dala-28 ne’ebé sei hala’o iha Singapura husi  05 Juñu to’o iha 16 Juñu 2015.

Primeiru-Ministru akompaña husi Sekretáriu Estadu Joventude no Desportu Sr. Leoviligdo Hornay hasoru jadór sira no atletizmu modalidade Futeból, Basketból, Boxing, Siklísmu, Taekwondo, Silat no mós Atletízmu iha Sede Sekretariadu Estadu ba Juventude no Desportu, iha Sionál-Dili, molok atleta sira balun desloka ba aeroportu atu halo viajen ba Singapura.

“Desportu importante tebtebes maibé desportu ho joventude hamutuk importante liután,” hatete Primeiru-Ministru. Tuir Primeiru-Ministru desportu importante tebtebes la’os de’it ba saúde maibé forma ema nia karáter tamba iha desportu ema tenke hatene bainhira mak ataka, bainhira mak defende, no bainhira mak ataka para manán no atu distrai adversáriu sira.

Tan ne’e Primeiru-Ministru salienta tan katak,  desportu hanesan escola-da-vida no no área importante atu dezenvolve mak ‘desporto escolar.’ Xefe Ezekutivu ne’e  husu ba  Sekretáriu Estadu Juventude no Desportu atu servisu hamutuk ho Ministériu Edukasaun atu promove ‘desporto escolar ‘ hodi nune’e desportista sira ba futuru bele sai husi eskola.

“Tempo ona ita haree ba oin, oinsá  introdús ‘desporto escolar’ maka’as liután hahú husi eskola bázika,” haktuir tan Primeiru-Ministru.

Rekrutamentu ba disportista maioria juventude sira tan ne’e, husu ba  SEJD atu oinsá kombina polítika juventude nian ho polítika desportu nian tamba “joventude halakon enerjia ba buat barak maibé tuir loloos  tenke  gasta enerjia ne’ebé bele prodús rezultadu pozitivu liuhusi desportu,  tan ne’e  presiza iha kondisaun sira nune’e desportu bele avansa ba oin.”

Iha biban hanesan Primeiru-Ministru husu mós ba setór privadu nia investimentu iha área desportu tanba 90% investimentu ba desportu ohin loron mai hosi Estadu. “Desportu iha Timor-Leste presiza hetan fonte finansiamentu ida ne’ebé klaru hodi dudu prosesu dezenvolvimentu iha área desportu nian ba oin.”

Primeiru-Ministru mós husu ba SEJD atu garante katak, Timor nia atleta sira wainhira atu ba partisipa iha eventu internasionál sira iha rai li’ur tenki lori osan per-diem atu kobre sira nia nesesidade sira  lorloron nian iha rai li’ur.

Primeiru-Ministru hato’o votu susesu no husu ba atleta sira atu dezafia an para lori medalla mai Timor-Leste.