Primeiru-Ministru Dr. Rui Maria de Araújo iha kinta-feira (28/05) lansa primeira pedra ba projetu atu harii Igreja Saun José Ai-Mutin foun, iha Dili, tuir konseitu kombinasaun kulturál no modernu, ne’ebé sei akomoda sarani besik 1.200.

“Uluk nana’in hodi Governu nia-naran ha’u hakarak fó parabéns ba Ita-boot sira hotu tanba mehi hakarak harii igreja boot ida no mehi ne’e sai duni realidade,” hateten Primeiru-Ministru ba komisaun harii Igreja foun ne’e.

Projetu harii Igreja Saun José Ai-Mutin foun ne’e, ho fundu sira liuhusi Fundu Sosiedade Sivíl iha tutela direta ba Gabinete Primeiru-Ministru nian.

Iha biban ne’e mós, Primeiru-Ministru salienta katak, Governu investe osan ba kontrusaun no reablitasaun Igreja sira la’ós de’it atu haree ba aspetu ekonómiku maibé mós husi aspetu morál no sosiál.

“Se ita hakarak ita nia ema sira iha tinan 10, 20 ka 50 mai oin bele produtivu, investimentu teinke hahú agora no investimentu la’ós de’it iha estrada, iha eskola ka iha sentru saúde de’it. Maibé invesitmentu tenke halo mós iha Igreja hanesan espasu públiku ne’ebé nia benefísiu la’ós ba ema na’in rua ka tolu maibé benefisia sarani barak ne’ebé mós sidadaun Timor-oan nian iha aspetu espirituál, morál no sosiál,” haktuir tan Primeiru-Ministru.

Xefe Governu subliña tan kona-ba Igreja no katolisizmu no língua portugeza ne’ebé tama iha Timor iha tinan 500 liubá maka halo ita úniku no diferente ho nasaun seluk iha rejiaun no ne’e sai ona Timor-oan sira nia identidade. “Tanba ne’e investe ba Igreja hanesan mós investe ba ita- nia identidade.”

Primeiru-Ministru iha biban ne’e mós husu ba komisaun organizadora atu harii Igreja Saun José Ai-Mutin foun ne’e atu garante kualidade husi obra  atu nune’e, bele asegura igreja foun ne’e nia ezisténsia ba tempu naruk.