Primeiru-Ministru Dr. Rui Maria de Araújo fó pose ba Prezidente no Komisáriu foun hosi Komisaun Funsaun Públika (KFP) iha Salaun Nobre Ministériu Negósiu Estranjeiru no Kooperasaun nian, iha Dili, horseik Sesta-Feira (29/05).

KFP foun sira ne’ebé mak simu pose nian maka: Dr. Faustino Cardoso Gomes, Komisáriu no Prezidente; Dra. Maria Domingas Alves, Komisária; Dra. Jacinta Bernardo, Komisária; Dra. Maria Olandina Caeiro Alves, Komisária; no Dr. José Telo Soares Cristovão, Komisáriu.

“Ohin ha’u fó posse ba Prezidente no Komisáriu foun sira ba Komissaun Funsaun Públika, nu’udar entidade responsável atu garante funsaun públika ne’ebé profisionál no di’ak liu atubele garante prestasaun servisu ho kualidade ba Estadu no ba sidadaun hotu-hotu,” hateten Primeiru-Ministru. “Durante tinan lima ba oin, sira sei asume kompromisu atu serve no defende nasaun no Timor-oan sira hotu-hotu.”

Primeiru-Minsitru temi mós katak depozita konfiansa tomak no hatene ho loloos katak sira ne’ebé foin simu pose KFP foun ne’e sei hala’o servisu ho kompromisu, ho forma imparsiál, integridade no livre hosi interesse polítiku.

Xefe Governu hateten mós kata, reforma ba administrasaun públika maka prioridade ba Governu Konstitusionál VI nian atubele hadi’a prestasaun servisu ba populasaun.

“Reforma, signifika halo progressu ne’ebé iha susesu liután atu hetan funsaun públika ne’ebé efisiente liu, ne’ebé servisu ho rigór, kualidade no responsabilidade, no hamenus burokrasia no ho forma simplifikada. Ida ne’e mak kompromisu ne’ebé ami asume,”  haktuir tan Primeiru-Ministru.

Komisaun Funsaun Públika harii iha tinan 2009, no estabelese atu reforsa kapasidade Administrasaun Públika nian no garante katak, setór públiku bazeia ba méritu no tuir modelu profisionál ne’ebé aas atubele fó ba povu servisu ne’ebé iha kualidade, efisiente, hodi garante jestaun dezempeñu ne’ebé ekonómika no efetiva.

Komisaun ne’e mós jere Sistema Informasaun no Jestaun Pesoál nian (PMIS), iha baze-dadus ida ne’ebé importante ho informasaun pesoál no profisionál ba funsionáriu públiku sira hotu ho loloos.

Dadaun ne’e totál númeru funsionáriu públiku sira nian maka besik 32,000. Governu Konstitusionál VI hapara rekrutamentu funsionáriu permanente sira nian no hahú ona haree fila fali kuadru jurídiku, tama mós Lei Funsaun Públika no Estatutu Funsaun Públika nian, hamutuk ho Komisaun Funsaun Públika no dirijente sira área Rekursu Umanu sira nian.

Iha okaziaun hanesan Primeiru-Ministru mós fó agradesimetu ba eis Prezidente KFP Eng. Libório Pereira no Komisáriu sira ne’ebé remata ona sira nia funsaun.

Ba sira ne’ebé mak foin simu pose Primeiru-Ministru “ha’u dezeja votu wa’in tebes ba  susesu no ezersísiu funsaun no ha’u iha fiar-metin katak sira nia ezemplu di’ak sei hamosu dezenvolvimentu iha ita nia Nasaun nian.”

Xefe Governu mós apresia ba apoiu tékniku hosi nasaun Austrália, Portugál no mós Brazíl sira nian kona-ba apoiu nível formasaun nian.