Primeiru-Ministru Dr. Rui Maria de Araújo hola parte iha loron sesta-feira (22/05) iha lansamentu livru kona-ba istória kontribuisaun hosi organizasaun klandestina estudantil RENETIL durante tempu okupasaun Indonézia ba ukun rasik an Timor-Leste nian.

Livru ne’e nia títulu kompletu “RENETIL iha Luta Libertasaun Timor-Lorosa’e: Antes Sem Título do que Sem Pátria” hosi autór Carlos da Silva LFR Saky nu’udar mós fundadór RENETIL nian no livru ne’e dokumenta kona-ba prosesu fundasaun RENETIL no oinsá maka bele fortalese frente tolu: Rezisténsia Armada, Klandestina no Diplomátika nian, no mós internasionaliza konflitu ne’ebé hala’o iha Timor, iha rai Indonézia no mós iha nível internasionál nian.

Primeiru-Ministru hodi Governu nia naran louva autór no kompañeiru RENETIL Sr. Saky nia inisiativa hodi hakerek livru ne’e.

“Hau hein katak livru ne’ebé hetan ona deskrisaun husi kompañeiru sira seluk bele aumenta tan informasaun kona-ba faktu istóriku barbarak ne’ebé rejista daudaun ona hodi nune’e jerasaun sira ba futuru ne’ebe tuir ita nia ain-fatin no ain-fatin bei-ala sira nian, bele haree nafatin valór sira no ho briu patriotismu nian no valór hirak seluk tan ne’ebé importante no ita hanesan povo hetan no halo parte ona iha ita nia istória,” hateten Primeiru-Ministru durante serimónia lansamentu livru ne’ebé hala’o iha Arquivo no Museu da Resistência Timorense, iha Dili.

Primeiru-Ministru iha biban hanesan lansa mós dezafiu ba testemuña sira istória hotu-hotu rezisténsia Timor-Leste nian ne’ebé balu partisipa mós iha lansamentu livru RENETIL nian atu tuir ezemplu autór livru nian no bele hahú mós hakerek ona ‘memórias hosi trinxeiras’ ne’ebé iha.

Primeiru-Ministru haktuir tan katak, husi pontudevista governu nian presiza atu ema hakerek tan sira nia memória tanba tempu la’o daudaun ona no presiza dokumenta istória atu iha garantia fidelidade nian hosi memória importante hirak ne’e.