………………………………………………………………………………………………………………
Díli, loron 11 fulan-juñu tinan 2015
KOMUNIKADU IMPRENSA
Sorumutuk Konsellu Ministrus loron 11 fulan-juñu tinan 2015
Konsellu Ministrus hala’o sorumutuk kinta-feira ne’e, iha loron 11 fulan-juñu tinan 2015, iha sala sorumutuk Konsellu Ministrus, iha Palásiu Governu iha Dili no aprova ona:
1. Dekretu-Lei kona-ba Planeamentu, Orsamentu, Monitorizasaun no Avaliasaun
Aprovasaun rejime jurídiku ne’e mai-hosi nesesidade ne’ebé liga ba planu anuál hosi instituisaun sira Estadu nian ba Orsamentu Jerál Estadu ho forma ida ne’ebé klaru no atu dezenvolve ferramente sira kona-ba informasaun finanseiru no monotorizasaun nian ne’ebé permite ba Governu hodibele iha kontrolu ida di’ak ba despeza operasionál sira, atu nune’e povu bele hatene loloos kona-ba nia osan hira maka gasta tiha ona.
2. Rezolusaun Governu ne’ebé aprova akordu entre RDTL no UE kona-ba livre husi Vistu bainhira hela iha tempu badak nia
Haree ba asinatura iha loron 26 fulan-maiu tinan 2015, akordu ida ne’e prevee livre husi vistu ba sidadaun sira Uniaun Europea no sidadaun sira Timor-Leste nian ne’ebé maka desloka ba teritóriu hosi parte kontraente seluk nian ho tempu másimu loron 90 ba kada períodu loron 180.
3. Dekretu-Lei ne’ebé mak Aprova Orgánika Ministériu Negósiu Estranjeiru no Kooperasaun
Ho aprovasaun Orgánika Ministériu Negósiu Estranjeiru no Kooperasaun, hakarak atu halo reajustamentu estruturál Ministériu nian, hodi hamenus númeru husi servisu sentrál nian sira (hamenus Diresaun Jerál no Diresaun Nasionál sira) hodi klarifika no fahe di’ak liután atribuisaun no kompeténsia sira, atu nune’e hamenus burokrasia no promove ho rigór, efisiénsia no efikásia istituisaun nian.