Governu Timor-Leste

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Dili, loron 10 fulan-juñu tinan 2015

Lansamentu kampaña ba Sensu tinan 2015

Kampaña kona-ba Sensu Nasionál Populasaun no Uma-Kain nian tinan 2015 nian lansa ona iha loron-segunda, iha serimónia ida ne’ebé hala’o iha Palásiu Governu nia oin, iha Dili. Kampaña ne’ebé sei hahú iha loron 11 fulan-jullu nian ne’e sei fahe informasaun kona-ba sensu oin mai.

Prezidente Repúblika, Taur Matan Ruak, marka prezensa hodi fó apoiu ba lansamentu kampaña ne’e nian hodi deskreve sensu hanesan “ferramenta ida ho valór boot, ne’ebé nasaun demokrátika sira uza hodi hatene populasaun sira nia nesidade.”

Primeiru-Ministru, Dr.Rui de Araújo, mós apela ba hotu-hotu atu partisipa no esplika katak sensu sira ne’e importante tebes ba planeamentu ida ne’ebé di’ak. “Labele haluha, ita boot sira-nia resposta sei hetan konsiderasaun mós no sei kontribui ba oinsá trasa ita-nia nasaun nia polítika no programa sira iha futuru,” nia fó hanoin.

Tema kampaña tinan 2015 nian maka “Hosi Povu ba Povu – Partisipa ba!

Sensu tinan 2015 sei sai nu’udar sensu datoluk iha Timor-Leste. Ida dahuluk hala’o iha tinan 2004 no ida daruak hala’o iha tinan 2010 liubá ne’e. Dadus sira ne’ebé maka rekolla ona ne’e utiliza beibeik ona atufoti desizaun hirak ne’ebé fundamentadu ho di’ak kona-ba lokalizasaun no prestasaun servisu sira iha área saúde no edukasaun nian sira, no kona-ba dezenvolvimentu infraestrutura sira ne’ebé adekuada, hanesan estrada no ponte.

Iha semana sira ne’ebé tuir loron 11 fulan-jullu nian mai, agregadu familiár hotu-hotu iha munisípiu 13 iha Timor-Leste, sei simu vizita husi ekipa resenseadór nian sira, ka, “responsável sira ba rekolla dadus”, ne’ebé hetan tiha ona formasaun espesiál ba knaar ida ne’e. Kompete mós ba resenseadór sira atu husu ba xefe família husi agregadu familiár no kona-ba ema sira ne’ebé maka kalan toba iha ninia uma, iha loron 11 fulan-jullu nian. Ekipa sira ne’e tenke rai segredu profisionál no sira labele hateten sai ema hirak ne’ebé maka sira entrevista ne’e ninia naran, ne’e dehan katak dadus ne’ebé rekolla ona labele iha ligasaun ho família ka ema ruma nia naran. Resenseadór hotu-hotu sei identifikadu loloos.

Diretór-Jerál Diresaun-Jerál Estatístika nian, António Freitas, husu ba xefe família hotu-hotu atubele hanoin didi’ak sesé de’it maka hela iha ninia uma iha loron 11 fulan-jullu kalan. No nia husu “Loke imi-nia odamatan ba resensiadór sira, kolabora ba iha rekolla dadus sira no sente orgullu ba tanba ita moris iha nasaun ne’ebé halo planeamentu bazeia ba dadus ne’ebé tuir realidade no loloos sira, atu hametin ita-nia demokrasia.”

Sensu Nasionál tinan 2015 hanesan serbisu ida ho dimensaun boot ba Governu Timor-Leste nian, ne’ebé maka hala’o husi Diresaun Jerál Estatístika Ministériu Finansas nian. Formasaun ba pesoál sira hahú iha tinan kotuk, bainhira hala’o sensu-pilotu iha fulan-agustu, iha área sira ne’ebé mak selesiona tiha ona iha minisípiu 8 husi munisípiu 13 iha Timor-Leste.

Fundu Populasaun Nasoins Unidas nian [UNFPA], ne’ebé fó apoiu ba esforsu ne’ebé Timor-Leste dezenvolve ona durante sensu 2004 no 2010 nian, kontinua fó sira-nia apoiu iha tinan 2015. Tinan ida ne’e, organizasaun ONU nian ba Feto kontribui mós ba sensu, hodi fó apoiu iha formasaun no divulgasaun.

Portavós Governu Timor-Leste nian, Ministru Estadu Agio Pereira, hateten katak “Governu agradese ba sira hotu ne’ebé mak envolve-an atu hala’o serbisu boot ida ne’e no hato’o ninia agradesimentu ba partisipasaun povu tomak Timor-Leste nian. Informasaun foun hirak ne’ebé mak hetan iha sensu 2015 nian ne’e util tebetebes. Ba Governu Konstitusionál VI, ne’ebé mak fó liu atensaun ba efikásia husi despeza no ba prestasaun servisu ho kualidade, dadus hirak ne’ebé mak itabele fiar hanesan ne’e importante tebetebes.”