Kondolénsia ba vítima sira husi rai-nakdoko iha Sabah
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 08 fulan-juñu tinan 2015
Kondolénsia ba vítima sira husi rai-nakdoko iha Sabah
Governu Timor-Leste hato’o ninia kondolénsia ba ninia viziñu besik sira, Malázia no Singapura, ba ema hirak ne’ebé lakon vida tanba rai-nakdoko ida ne’ebé provoka rai monu iha foho Kinabalu, iha Estadu Sabah, Malázia, iha loron 5 f ulan-juñu.
Autoridade Malázia nian sira konfirma ona, iha loron-domingu ne’e, katak iha ema na’in 16 maka mate. Barakliu husi sira ne’ebé lakon sira-nia vida, tuir identifikasaun ne’ebé halo ona, hanesan sidadaun Malázia no Singapura nian. Labarik na’in neen husi ensinu báziku husi Singapura no sira-nia profesór sira inklui mós vítima mate hirak ne’ebé konfirmada tiha ona: alunu sira husi Eskola Primária tanjong Katong, iha momentu ne’ebá, sa’e hela ba foho tutun, iha ámbitu vizita estudu nian ida.
Timor-Leste hatudu ninia solidariedade ba sira-hotu ne’ebé afetadu husi trajédia ida ne’e.
Portavós Governu Timor-Leste nian, Ministru Estadu Agio Pereira, dehan katak “ami-nia hanoin hamutuk ho sira ne’ebé moris iha situasaun lutu nia laran, liu-liu ho sira ne’ebé lakon sira-nia oan iha trajédia ida ne’e”. REMATA