Líder Órgaun Soberanu Repúblika Demokrátika Timor-Leste (RDTL) hato’o sira nia orasaun hodi fó omenajen ba Saudozu Fernando Lasama de Araújo, iha rezidénsia Faról, Dili, loron kuarta, 3 fulan-marsu 2015. Ministru Estadu no Koordenadór Asuntu Sosiál sira no Ministru Edukasaun ne’e, hakotu nia iis iha loron tersa, 2 fulan-juñu 2015 dadersán iha Ospitál Nasionál Guido Valadres, Dili.

Iha velóriu ne’ebé hahú iha tuku 03.00 lorokraik,  líder órgaun soberanu sira ho ninia funsiunáriu sira, tama iha área rezidénsia nian tuir oráriu ne’ebé tau tiha ona iha programa.

Husi Prezidénsia Repúblika nian, Prezidente RDTL Taur Matan Ruak maka lidera diretamente, akompaña husi nia espoza, Isabel Ferreira ho funsiunáriu sira. Entertantu órgaun soberanu Parlamentu Nasionál nian, lidera husi Prezidente Parlamentu Nasionál, Vicente Guterres, akompaña husi membru Parlamentu Nasionál ho funsiunáriu sira.

Husi Tribunál Rekursu, Prezidente Tribunál Rekursu, Guilherme da Silva maka lidera omenajen hamutuk ho funsiunáriu sira. Nune’e mós Primeiru-Ministru, Rui Maria de Araújo, maka lidera velóriu hamutuk ho membru Governu sira no funsiunáriu tomak, remata iha kuaze tuku 07.00 kalan.

Komandu Jerál Falintil-Forsa Defeza  Timor-Leste (F-FDTL), Polísia Nasionál Timor-Leste (PNTL) nian sira hato’o mós sira ninia omenajen.

Iha loron kinta-feria, 4 fulan-juñu 2015, Korpu Diplomátiku sira iha biban ida ne’e mós hato’o sira ninia omenajen. Ajénsia Internasionál sira, Veteranu sira, Antigu Kombatente sira no Organizasaun Rezisténsia, Universidade no Institutu Akadémiku, Ensinu Pré-Primária, Primária, Pré-Sekundária, Sekundária, Partidu Polítiku sira, Konfisaun Relijioza sira, Sosiedade Sivíl no naklole mós ba públiku akompaña hosi Ministériu Edukasaun.

Prosesu ba serimónia funerál hala’o iha loron sesta-feira, 5 fulan-juñu 2015. Prosesu ne’e hahú husi lori saudozu hosi rezidénsia faról nian ba Ministériu Edukasaun atu hetan omenajen ikus. Tuir mai, Misa Requiem iha Igreja Katedrál Dili. Hafoin ne’e, kontinua ba Parlamentu Nasionál atu hetan omenajen ikus liu no kondekorasaun husi Prezidente Repúblika. Serimónia funerál hala’o iha Jardin Erói Metinaru, Dili, tuku haat lokraik.